Żagħżugħ li allegatament inqabad jisraq fliexken whisky minn supermarket f’Santa Venera nżamm arrestat wara li wieġeb mhux ħati fejn talab lill-Qorti li ma riedx imur il-ħabs. Dawid Pawel Paruzel ta’ 29 sena residenti l-Gżira, spiċċa akkużat quddiem il-Maġistrat Ian Farrugia, jumejn biss wara li ammetta f’kawża separata fejn ingħata sentenza sospiża.
Ftit tas-sigħat wara dik il-kundanna, huwa allegatament intlemaħ fuq cameras tas-sigurtà fis-Supermarket Wellbees jieħu numru ta’ fliexken tal-alkoħol minn fuq l-ixkaffa u daħħalhom fil-backpack tiegħu. Supervisor tal-ħanut avviċina lis-suspettat wara li rah jisraq il-fliexken.
Sakemm avviċinah l-impjegat tas-Supermarket, allegatament kien seraq 10 fliexken. Is-serqa ma seħħitx minħabba xi ħaġa indipendenti mill-volonta tal-akkużat. Il-pulizija mir-Rapid Intervention Unit ġew infurmati u ż-żagħżugħ ġie arrestat.
Il-Ġimgħa, hu ġie mixli b’attentat ta’ serq, li wettaq l-allegat reat waqt li kien taħt sentenza sospiża mogħtija fil-15 ta’ Novembru. L-ewwel Paruzel kien inklinat li jwieġeb ħati iżda mbagħad biddel fehmtu, u qal li ma riedx imur il-ħabs.
Huwa nżamm taħt arrest preventiv. L-avukat mill-uffiċċju tal-AĠ Joseph Camilleri Azarov u l-Ispettur Elisia Scicluna mexxew il-prosekuzzjoni. L-Avukat Leontine Calleja kienet l-avukat tal-għajnuna legali għall-akkużat.
