Wara snin twal ta’ ħidma, il-ħolma ta’ diversi żgħażagħ u studenti saret realtà. Dan hekk kif it-Tnejn wara nofsinhar, bdew iċ-ċerimonji tal-gradwazzjoni tal-istudenti li ġabu degree mill-Università ta’ Malta kif ukoll mill-MCAST.
Iċ-ċerimonji tal-gradwazzjoni li bdew it-Tnejn 20 ta’ Novembru, se jiġu fi tmiemhom fit-24 ta’ Novembru fl-Università ta’ Malta filwaqt li fl-MCAST iċ-ċerimonji se jiġu fi tmiemhom fl-1 ta’ Diċembru.
It-Tnejn .. fis-Sala Sir Temi Zammit fl-Università ta’ Malta kien imiss lill-istudenti li gradwaw mill-Fakultà tas-Social Wellbeing, tal-Accounts kif ukoll l-istudenti li gradwaw mill-Fakultà tal-Mediċina.
Matul il-jum tat-Tlieta, komplew ukoll iċ-ċelebrazzjonijiet tal-istudenti u l-buscades tradizzjonali bil-Kap tal-Partit Nazzjonalista Bernard Grech jintaqa’ mal-istudenti li ġew iżuru d-Dar Ċentrali. Fl-istess jum, kien imiss il-gradwazzjoni ta’ aktar studenti fosthom dawk li gradwaw mill-Fakultà tax-Xjenza.
Aktar tard filgħaxija saret ukoll il-gradwazzjoni tal-istudenti li gradwaw mill-Fakultà tal-Health Sciences fosthom studenti li studjaw għal infermieri – b’waħda mill-gradwati tkun il-ġurnalista ta’ Net News Chayenne Riolo.
Apparti minn hekk matul il-jum tat-Tlieta fl-MCAST iggradwaw numru ta’ studenti fosthom studenti tal-ġurnaliżmu u creative media production. Fost dawn l-istudenti kien hemm il-ġurnalista ta’ Net News Maria Borg kif ukoll il-video editor Carla Genovese.
Il-kamra tal-aħbarijiet ta’ NET Television tawgura l-isbaħ xewqat lil dawn il-gradwati kollha li temmew l-istudji taghhom mill-Universita ta’ Malta kif ukoll mill-MCAST.
