Intlgħabet is-sitt ġurnata mir-rawnd ta’ Kwalifikazzjoni tal-Konfederazzjoni tal-Amerika t’Isfel għat-Tazza tad-Dinja 2026.
Fost il-ħames partiti li ntlagħabu tispikka r-rebħa taċ-champions tad-dinja l-Argentina li barra minn darhom għelbu 1-0 lil Brazil.
Fil-Maracana’ f’Rio de Janeiro, il-ħames rebħa minn sitt partiti għall-Argentina li saħħet postha fl-ewwel post tal-grupp bi 15-il punt. Għal kuntrarju tkompli s-serje negattiva tal-Brażil li bit-tielet telfa minn sitt partiti jinsabu fis-sitt post.
L-ewwel taqsima ntemmet fi draw ta’ mingħajr gowls biex il-gowl deċiżiv kien skorjat fit-63 minuta permezz ta’ Nicolas Otamendi li minn azzjoni ta’ Giovani Lo Celso għeleb lil Alisson Becker.
Fil-81 minuta r-referee Piero Mora Gomez keċċa b’karta ħamra diretta lil Joelinton tal-Brażil.
Fil-partiti l-oħra li ntlagħabu mill-istess rawnd ta’ kwalifikazzjoni:
Paragwaj 0-1 Kolumbja
Ekwador 1-1 Ċili
Urugwaj 3-0 Bolivja
Perù 1-1 Venezuela
