Beda l-ġuri ta’ sitt adolexxenti Franċiżi akkużati b’kumpliċità fil-qtil brutali ta’ għalliem f’subborg ta’ Pariġi u li kien seħħ f’Ottubru tal-2020.
L-għalliem, Samuel Paty, spiċċa mbiċċer taħt idejn refuġjat Ċeċen u s-suspettati qed ikunu akkużati dwar ‘gideb u kalunji li rriżultaw f’konsegwenzi fatali’ u talli huma indikaw l-għalliem lill-qattiel qabel l-omiċidju. Jekk jinstabu ħatja, huma jistgħu jeħlu bejn sentejn u tliet snin ħabs kull wieħed.
Samuel Paty spiċċa jaqla’ diversi daqqiet ta’ sikkina mingħand l-aggressur li anki qatalu rasu barra waqt id-dagħdigħa ta’ vjolenza. Mifhum li l-għalliem kellu jħallas b’ħajtu wara li kien wera karikaturi tal-Profeta Muhammad ( il-fundatur tal-Islam) lill-istudenti waqt lezzjoni dwar il-libertà tal-espressjoni.
L-iżgħar suspettata, tifla ta’ 13-il sena, allegatament kienet gidbet lil missierha meta infurmatu li hi ngħatat piena dixxiplinarja talli konfrontat lil Samuel Paty wara li hu ‘talab biex l-istudenti Musulmani joħorġu kollha ‘il barra mill-klassi.’
