Koppja Ungeriża – traffikanti ta’ persuni umani nvoluti f’ċirku ta’ prostituzzjoni ntbagħtu l-ħabs għad-delitti li wettqu wara li wieġbu ħatja bħala parti minn ftehim ta’ sentenza bejn il-prosekuzzjoni u d-difiża. Robert Attila Majlat ta’ 42 sena u Attilane Majlat ta’ 37 sena kienu ġew investigati u aktar tard tresqu l-Qorti wara li l-pulizija Maltija ġiet infurmata mill-awtoritajiet Ingliżi dwar suspetti li l-koppja kienu involuti fit-traffikar ta’ nisa minn diversi pajjiżi fil-kummerċ tas-sess.
Waħda mill-vittmi kienet qalet lill-qorti li Robert Majlat kien “xtraha” mingħand ‘pimp’ ieħor meta kellha 19-il sena. Il-koppja kienet instabet ħatja mill-Qorti tal-Maġistrati fl-2019 u ngħataw sentenza ta’ 12-il sena ħabs.
Il-kundanna ġiet invalidata fl-appell sena wara u ntbagħtet lura fil-Qorti tal-Maġistrati, minħabba li l-qorti inferjuri ma kinitx ħalliet lill-avukat difensur tal-koppja jagħmel il-kontro-eżami lin-nisa li sostnew li ġew traffikati.
Il-koppja mbagħad instabet ħatja għal darb’oħra mill-Maġistrat tal-Qorti u kemm Robert kif ukoll Attilane Majlat ġew ikkundannati disa’ snin ħabs. Iżda t-tieni appell ġie ppreżentat mill-koppja kien suċċess. Fi Frar, l-Imħallef Aaron Bugeja reġa’ ħassar is-sentenza tal-koppja, u ddikjara l-kundanna bħala nulla għaliex l-Avukat Ġenerali ma kellux jagħżel li l-każ jiġi ġġudikat mill-Qorti tal-Maġistrati iżda mill-qrati superjuri.
Waqt il-kumpilazzjoni tal-provi mill-ġdid li nfetħet quddiem il-Maġistrat Elaine Mercieca, il-koppja ammettiet l-akkużi bħala parti minn patteġġament milħuq mal-Avukat Ġenerali. Il-każ imbagħad intbagħat fil-Qorti Kriminali biex tingħata s-sentenza.
Meta l-Ġimgħa ssejħet is-seduta għas-sentenza, l-Imħallef Edwina Grima, li tippresjedi l-Qorti Kriminali, staqsiet liż-żewġ imputati jekk kinux konxji tal-konsegwenzi legali li tikkonferma l-ħtija tagħhom, huma kkonfermaw li kienu qed iressqu ammissjoni tagħhom.
Waqt li tat sentenza kif xieraq, il-qorti ddikjarat lill-akkużati ħatja tal-akkużi kontrihom. Robert Attila Majlat kien ikkundannat għal 10 snin ħabs, u għall-ħlas ta’ multa ta’ €10,000. Attilane Majlat ġiet ikkundannata disa’ snin ħabs u ordnata tħallas multa ta’ €7,000.
L-Avukat Etienne Savona mexxa l-prosekuzzjoni f’isem l-Uffiċċju tal-Avukat Ġenerali. L-avukati Noel Bianco, Alfred Abela u Rene Darmanin kienu l-avukati difensuri. L-Avukat Lara Dimitrijevic dehret għall-vittmi bħala parte civile.
