Raġel ta’ 42 sena residenti n-Naxxar ġie mmultat €3,000 mill-Maġistrat Nadine Lia wara li nstab ħati li żamm xadina li ġejja mill-Afrika f’post mhux adegwat fil-Mellieħa. Albert Grima kien tressaq mill-Ispettur Elliott Magro li nvestiga każ.
Ġalea kien ġie akkużat li fit-13 ta’ Jannar 2022, u fil-ġranet u ġimgħat ta’ qabel, kellu annimal perikoluż u tar-razza ‘Chlorocebus Sabaeus’. Magro kien akkuża lil Grima wkoll li żamm dan l-annimal f’sit mhux approvat mill-awtoritajiet u li żammu fi stabbiliment mhux zooloġiku.
Chlorocebus Sabaeus huwa l-isem xjentifiku tal-Green Monkey, xadina li tinstab fil-Punent tal-Afrika. Il-Pulizija kien daħlilha rapport li kien hemm persuna qed iżżomm xadina fil-lokalità tal-Mellieħa. Mill-investigazzjoni ħareġ li la x-xadina, la s-sid u lanqas il-post ma kienu reġistrati mad-Dipartiment għas-Servizzi Veterinarji.
Meta marru l-uffiċjali biex jispezzjonaw il-post sabu li x-xadina kienet miżmuma fi stat tajjeb u kienet għand sid ieħor qabel li wkoll ma kienx irreġistrat. Id-Direttur tas-Servizzi Veterinarji qal lill-Qorti li x-xadini huma meqjusa bħala annimal perikoluż,
Dan peress li jistgħu jikkontaminaw u jmexxu mard li jaffettwa lill-bniedem. Grima qal fil-Qorti li x-xadina spiċċat għandu għax is-sidien tagħha kienu se jitilqu minn Malta u kienu se jraqqduha jekk ma jsibux ma’ min iħalluha.
Il-Maġistrat Lia qalet li jirriżulta li l-akkużat qatt ma rreġistra x-xadina minħabba li l-awtoritajiet għamlulu impediment milli japplika. Dan għax waqt li fl-2016 kellu perjodu ta’ xahrejn fejn seta’ jirreġistra, u ma għamilx hekk, anke kieku wara ried jirreġistraha ma ħarġux aktar reġistrazzjonijiet.
Il-Qorti filwaqt li qalet li x-xadina kienet miżmuma tajjeb minn naħa l-oħra kienet qed tinżamm ma kienx meqjus bħala post adegwat għal speċi bħal din. Għaldaqstant filwaqt li ma sabitux ħati li kellu fil-pussess tiegħu annimal perikoluż mhux reġistrat sabitu ħati li żamm annimal f’post mhux adegat u mmultatu €3,000.
