Robert Abela ma jridx li tinfetaħ kawża biex inġibu l-flus lura li nsterqu mill-isparijiet – PN
“Din il-ġimgħa se nkunu qed immorru l-Qorti fejn din id-darba se niftħu kawża sabiex nagħmlu ċert li jinġiebu lura l-€400 miljun li insterqu minn but il-poplu Malti u Għawdxi”
Hekk sostna l-Kap tal-Partit Nazzjonalsita Bernard Grech il-Ħadd waranofsinhar matul ix-xandira Maratona Ġbir ta’ Fondi organizzata mill-Partit Nazzjonalista.
Akkumpanjat mid-Deputat Nazzjonalista Adrian Delia, Bernard Grech spjega t-triq ‘il quddiem sabiex il-poplu Malti u Għawdxi jġib lura l-€400,000,000 mgħotija mill-Gvern Laburista lill-kumpaniji Vitals u Steward … f’kuntratti dikjarati frawdolenti mill-Qorti.
Għaldaqstant il-Partit Nazzjonalista fil-jiem li ġejjin se jkun qiegħed jiftaħ kawża l-Qorti …u b’hekk ikun jista’ jibda bix-xogħol biex il-poplu jingħata flusu lura.
Huwa insista li l-Partit Nazzjonalista għamel minn kollox biex jimbotta lill-Prim Ministru Robert Abela u lill-Kummissarju tal-Pulizija Angelo Gafà flimkien mal-Avukat Ġenerali Victoria Buttigieg u l-Avukat tal-Istat Chris Soler – iżda jidher li kollox waqa’ fuq widnejn torox.
Bernard Grech insista li huwa biss il-Partit Nazzjonalista li jservi ta’ tarka għall-poplu Malti u Għawdxi.
Id-Deputat Nazzjonalista Adrian Delia saħaq li l-Qorti tal-Appell sostniet li l-ogħla esponenti tal-Gvern u l-aġenziji tiegħu kienu f’kollużżjoni mal-barranin biex jisirqu lill-poplu Malti u Għawdxi.
Huwa insista li f’kull pajjiz normali jirriżenjaw dawk kollha involuti f’każ ta’ dan it-tip, jew saħansitra jaqa’ il Gvern. Iżda f’Malta kellna PM li baqa’ jiġġustifika dak li seħħ – u jiddefendi lil ta’ Steward.
Adrian Delia saħaq li l-PN irid jaċċerta li tittieħed responsabbiltà, li dak li ma jridx iwettaq il-Gvern jagħmlu….u kull min naqas iġorr il-konsegwenza ta’ għemilu.
Bernard Grech u Adrian Delia fakkru li l-Gvern ma jistax ikun sar jaf bl-akbar frodi fl-istorja…..u qisu xejn m’hu xejn. U huwa għalhekk li l-PN se jibqa’ jistinka biex issir ġustizzja, u jinġiebu lura l-miljuni li insterqu f’din il-frodi.
