Irridu nagħmlu ekonomija li tħares il-kwalità tal-ħajja taċ-ċittadin, u mhux waħda a skapitu tal-familji. Sostna dan il-Kap tal-Partit Nazzjonalista Bernard Grech hekk kif attenda għas-Summit Ewropew fi Brussell.
Bħala membru mal-Partit Popolari Ewropew, il-Kap tal-Partit Nazzjonalista spjega kif f’din il-laqgħa ġew diskussi diversi temi – fosthom l-iskills gap li diversi pajjiżi qed jaffaċjaw.
Hawn, Bernard Grech fakkar li l-viżjoni li għandu l-Partit Nazzjonalista għal pajjiżna hija waħda ġusta u li minnha jgawdi kulħadd.
Bernard Grech tkellem dwar l-importanza li l-liġi internazzjonali tibqa’ tiġi mħarsa biex jiġu salvati il-ħajjiet partikolarment fil-gwerra tal-Ukrajna u l-kunflitt f’Gaza.
Huwa stqarr li l-EPP u l-Ewropa sħiħa għandha bżonn tibgħat messaġġ importanti sabiex il-paċi tirrenja fost il-ġnus. Dan filwaqt illi insista li l-populiżmu qiegħed jerfa’ rasu u li ma nistgħux nħallu n-narrattiva populista tiġri bina għaliex ir-rispett fost il-bniedem hija l-essenzjal u l-bażi ta’ kollox.
Bernard Grech stqarr li ddiskuta wkoll l-isfida li l-Port Ħieles potenzjalment qiegħed iħabbat wiċċu magħha.
Fil-kapitali Belġjana, Bernard Grech kellu diversi laqgħat mal-mexxejja Ewropej fosthom mal-President tal-Kummissjoni Ewropea Ursula Von der Leyen, il-President tal-Parlament Ewropew u MEP tal-Partit Nazzjonalista Roberta Metsola kif ukoll mal-President tal-Partit Popolari Ewropew, Manfred Weber.
Dan kien l-ewwel summit għal Donald Tusk wara li rritorna fit-tmexxija tal-Polonja.
Il-laqgħat fi Brussell iffukaw ukoll fuq it-tkabbir tal-blokk Ewropew, u l-istabbiltà fir-reġjun.
Il-Kap tal-Partit Nazzjonalista kellu wkoll laqgħa bilaterali mal-Ispeaker tal-Parlament Ċiprijott u Kap tal-Partit Ċiprijott, Annita Demetriou. Magħha hu ddiskuta temi komuni għal Malta u Ċipru, fosthom l-immigrazzjoni u x-xogħol. Hi rreferiet għall-istqarrija li għamel il-Kap tal-Partit Nazzjonalista fis-Summit u sostniet li taqbel miegħu.
Il-Kap tal-Partit Nazzjonalista kien akkumpanjat mis-Segretarju Internazzjonali tal-Partit Nazzjonalista Beppe Galea.
