Il-kumpanija Malta Dairy Products Ltd. qed tħabbar li, b’effett mil-Ġimgħa 22 ta’ Diċembru, 2023, se jkun hemm aġġustament fil-prezzijiet tal-prodotti tal-ħalib frisk tagħha biex jirriflettu ż-żidiet sinifikanti fl-ispejjeż tal-produzzjoni u tal-operat.
Matul l-aħħar ħames snin, Malta Dairy Products ħasbet biex iżżomm prezzijiet stabbli għall-prodotti tal-ħalib frisk tagħha minkejja li kienet qed tiffaċċja spejjeż dejjem jiżdiedu fil-provvisti, materja prima, u servizzi. Dan l-impenn sar fost l-isfidi maħluqa minn ċaqliq ekonomiku, peress li l-kumpanija assorbiet l-ispejjeż dejjem jikbru biex tevita l-impatt dirett tagħhom fuq il-prezz tal-bejgħ.
Madankollu, minkejja l-implimentazzjoni ta’ diversi miżuri li jnaqqsu l-ispejjeż, bħas-simplifikazzjoni tal-operat u l-ottimizzazzjoni tal-proċessi tal-produzzjoni, iż-żieda sinifikanti fl-ispejjeż tax-xiri ma ġewx ikkumpensati għal kollox. Iż-żieda sostnuta fl-ispejjeż tal-produzzjoni u tal-operat laħqu stadju li mhuwiex aktar sostenibbli għall-operat tal-kumpanija. Għaldaqstant, wara konsiderazzjoni bir-reqqa, Malta Dairy Products sabet li huwa imperattiv li taġġusta l-prezzijiet kif xieraq biex taħseb għas-sostenibbiltà tal-Kumpanija filwaqt li tiżgura futur favorevoli għar-raħħala lokali u l-ħaddiema tagħha.
Kelliem għall-kumpanija qal: “Filwaqt li qatt mhi deċiżjoni faċli li naġġustaw il-prezzijiet, saret essenzjali għalina li nżommu l-kompetittività u nsostnu l-istandards ta’ kwalità li l-klijenti tagħna jesiġu. Aħna sinċerament napprezzaw il-fehim u l-lealtà kontinwa tal-klijenti tagħna matul din it-tranżizzjoni. L-appoġġ tagħhom huwa imprezzabbli hekk kif qed naffrontaw dawn l-isfidi iebsa.”
L-aġġustament fil-prezzijiet tal-ħalib frisk se jkun kif ġej:
Ħalib Sħiħ 1L kien €1.00 u ġie €1.15
Ħalib b’2.5% xaħam 1L kien €1.00 u ġie €1.15
Ħalib Xkumat 1L kien €1.00 u ġie €1.15
Ħalib mingħajr Lattożju 1L kien €1.25 u ġie €1.40
Ħalib b’2.5% xaħam ½ L kien €0.58 u ġie €0.66
Ħalib Xkumat ½ L kien €0.58 u ġie €0.66
Ħalib mingħajr Lattożju ½L kien €0.70 u ġie €0.77
Malta Dairy Products tibqa’ impenjata li tipprovdi prodotti tal-ħalib ta’ kwalità għolja, ta’ oriġini lokali u ppasturizzat li jilħqu standards ta’ kwalità stretti. L-aġġustament tal-prezz li ġej se jippermetti lill-Kumpanija tkompli twettaq dan l-impenn filwaqt li tiżgura l-vijabbilità tal-operat tagħha.
