Ġie imniedi l-programm kulturali ta’ attivitajiet li se jkunu organizzati minn Festivals Malta matul is sena d-dieħla. Programm li se jinkludi fih 12-il festival prinċipali flimkien ma’ 250 attività li se jittellgħu matul is-sena li se jservu bħala pjattaforma għall-folklor, l-ilsien u l-identità ta’ pajjiżna.
Il-Kap Eżekuttiv ta’ Festivals Malta Frans Agius tkellem dwar l-importanza li ta’ kull sena jsiru attivitajiet bħal dawn li jkomplu jippromwovu t-talent Malti.
Fid-diskors tiegħu Frans Agius għamel aċċenn fuq l-aspett edukattiv u l-involviment tat-tfal u ż-żgħażagħ f’dawn l-avvenimenti… avvenimenti innovattivi li jpoġġu t-talent Malti fil-quċċata.
Min-naħa tiegħu ċ-Chairman ta’ Festivals Malta Aaron Zahra qal lifost l-attivitajiet prinċipali li se jittellgħu s-sena d-dieħla minn Festivals Malta hemm il-Karnival li se jsir bejn id-9 u t-13 ta’ Frar kif ukoll Notte Bianca li ta’ kull sena jsir f’Ottubru; żewġ avvenimenti li jiġbdu lejhom eluf ta’ persuni kemm Maltin kif ukoll turisti.
Ma jonqosx ukoll il-festival ‘Mużika Muzika’ fejn f’Marzu tas-sena d-dieħla se ssir ir-raba’ edizzjoni ta’ dan il-konkors mużikali li jippromwovi l-lingwa Maltija.
Avvenimenti oħra li se jsiru matul is-sena d-dieħla huma l-Valletta Baroque Festival, l-Opra Valeriana, il-festival Ritmu, il-Malta Jazz Festival kif ukoll il-Malta International Arts Festival.
Ma jonqosx ukoll il-karnival tas-sajf kif ukoll id-Dance Festival Malta. Il-programm kulturali mbagħad jagħlaq bil-festival The Three Palaces u l-Valletta Early Opera Festival.
