Raġel ta’ 64 sena mix-Xemxija ngħata l-ħelsien mill-arrest, sakemm jitlesta rapport ta’ qabel is-sentenza, wara li ammetta li ħareġ arma tan-nar waqt argument nhar it-Tlieta. Ir-raġel, li ismu huwa suġġett għal projbizzjoni imposta mill-qorti fuq il-pubblikazzjoni, tressaq il-Qorti quddiem il-Maġistrat Leonard Caruana l-Ħamis wara nofsinhar.
L-Ispettur tal-Pulizija Clayton Camilleri qal lill-Qorti li għall-ħabta tat-8pm tad-19 ta’ Diċembru, il-pulizija kienet irċeviet rapport li raġel kien ħareġ arma tan-nar waqt argument. Fuq il-post marru uffiċjali tal-Pulizija li ġabu s-sitwazzjoni taħt kontroll, u wara r-raġel ġie arrestat. Tfittxijiet sussegwenti kienu rkupraw arma oħra mill-pussess tal-imputat, qal.
Ir-raġel fl-iżbarra ammetta l-akkużi meta mitlub x’kien se jwieġeb. Il-Qorti għarrfet lill-imputat li kienet se tistaqsih jekk xtaqx jikkonferma l-ammissjoni tiegħu fi ftit minuti, u wissietu li jekk jagħmel, ikollha tipproċedi biex tagħti l-piena.
Wara li aġġorna s-seduta għal kważi 30 minuta biex l-imputat jikkonsulta mal-avukat tiegħu, il-maġistrat għal darb’oħra staqsa x’qed jitlob. “Ħati,” reġgħet ġiet ir-risposta. L-avukat difensur RIchard Sladden talab li jiġi ordnat rapport ta’ qabel is-sentenza, biex jiġu eżaminati ċ-ċirkostanzi li wasslu għar-reat.
Il-Prosekutur l-Avukat Kevin Valletta qabel mat-talba, u ssuġġerixxa li l-qorti tagħmel dispożizzjonijiet għas-sigurtà tal-partijiet l-oħra fil-perjodu interim. Il-qorti ordnat lis-Servizzi tal-Probation biex ifasslu r-rapport.
L-Avukat Manuel Galea, li jirrappreżenta lill-vittma, qal li fid-dawl tal-akkużi, ikun fl-interess tal-partijiet kollha li tinħareġ ukoll ordni ta’ trażżin fir-rigward tal-klijent tiegħu. It-talba ġiet milqugħa, bil-Qorti twissi lill-imputat li huwa jiffaċċja perijodu addizzjonali sa sentejn ħabs u multa ta’ €7,000 jekk jiksirha.
Sladden talab il-ħelsien mill-arrest għall-klijent tiegħu, u argumenta li l-ordni ta’ trażżin wassal biex id-detenzjoni kontinwa tal-akkużat taħt arrest ma kinitx meħtieġa. Wara li semgħet is-sottomissjonijiet tal-partijiet dwar il-kwistjoni, il-Qorti ħelset lir-raġel mill-arrest, garantit b’depożitu ta’ €2,000 u garanzija personali ta’ €5,000, sakemm jiġi ppreżentat ir-rapport ta’ qabel is-sentenza fi Frar tas-sena d-dieħla.
