Madwar 100 tifel u tifla ħarġu jistennew bil-ħerqa lil Santa Klaws jixxabbat biex jinżel mal-Knisja ta’ San Franġisk, fil-Ħamrun sabiex itihom ir-rigali.
F’attività li saret wara l-quddies tat-tfal fid-9 am, propju lejlet il-Milied, persuna professjonali liebsa ta’ Santa Klaws ixxabbat mal-Knisja biex jilqa’ lit-tfal li kienu quddiem l-entratura tal-Knisja. Mal-mument li miss l-art, Santa Klaws beda jqassam ir-rigali, bit-tfal kollha eċitati jaraw x’għadhom kemm qalgħu.
Fl-aħħar ġurnata tal-Avvent, din żgur kienet speċjali għat-tfal fejn tul il-quddiesa sar rakkont b’Marija u Ġużeppi jfittxu post fejn iwelldu lil Ġesù.
Wara l-quddiesa kien hemm ukoll banda bil-bandisti libsin barnuża tal-Milied u anke Santa Klaws li flok niżel miċ-ċumnija, niżel mal-kampnar biex jgħati r-rigali lit-tfal.
