Dan iż-żmien ta’ festi jġib miegħu ħafna emozzjonijiet ta’ ferħ speċjalment għall-familji u t-tfal. Però għal uħud iġib ukoll sentimenti ta’ dieqa, speċjalment għal min iħossu waħdu… iżda grazzi għall-Caritas – propju fil-jum tal-Milied, in-nies li jbatu mis-solitudni u fittxew l-għajnuna, ma baqgħewx waħedhom.
Dawn huma uħud mill-messaġġi sbieħ li kitbu l-istudenti tal-iskola ta’ Saint Joseph għan-nies li f’Jum il-Milied attendew l-ikla tal-Milied organizzata mill-Caritas; fejn għat-tmien sena konsekuttiva pprovdiet ikla sħuna lil dawk il-persuni li jinsabu waħedhom f’dawn il-jiem ta’ festi.
Il-koordinatur tas-servizzi psiko-soċjali tal-Caritas Josef Pace spjegalna li bl-għajnuna ta’ Alfred Mizzi Foundation li pprovdiet l-ikel kollu għal din l-ikla, kif ukoll l-uffiċċju tal-President li pprovda l-ħelu u St. Peter’s Foundation li għenet fil-loġistika, il-binja tal-Kurja inbidlet f’ristorant kbir u laqgħat fiha l’fuq minn 550 persuna għall-ikla tal-Milied.
Kif spjegalna tajjeb Josef Pace, din is-sena l-Caritas m’offrietx biss ikel lill-familji fil-bżonn iżda offriet diversi rigali sabiex tferraħ lill dak li jkun fil-jum tal-Milied, filwaqt li pprovdiet ukoll għajnuna fuq livell personali.
Dan kollu seta’ jsir grazzi għall-volontiera li qattgħu l-Milied jgħinu fil-binja tal-Kurja.
Net News tkellem ukoll ma’ Peter Paul Gauci – wieħed mill-volontiera preżenti fejn qalilna li b’kollox kienu madwar mitt volontier li għażlu li jgħinu lill-Caritas f’dan il-jum, minflok iqattgħu l-Milied id-dar mal-familja tagħhom.
Intant il-koordinatur tas-servizzi psiko-soċjali tal-Caritas Josef Pace appella lill-poplu Malti sabiex jingħaqad flimkien bħala familja waħda mhux biss fiż-żmien tal-Milied iżda kull ġurnata tas-sena, u jekk inkunu nafu b’xi ħadd li qiegħed ibati mis-solitudni noffrulu spalla u ftit għajnuna.
Preżenti għall-ikla organizzata mill-Caritas kien hemm ukoll il-Familja Grech, fejn flimkien mal-volontiera taw is-sehem tagħhom lil min hu fil-bżonn.
