Ħajtu nqalbet ta’ taħt fuq mill-lejl għan-nhar. Minn persuna miżżewġa b’żewġt ibniet jgħix ħajja pjuttost normali spiċċa jissielet għal ħajtu fit-Taqsima tal-Kura Intensiva u tilef partijiet minn saqajh u jdejh it-tnejn.
Shawn Mifsud – missier ta’ 37 sena. Jum minnhom stenbaħ b’uġigħ ta’ ras u deni qawwi li b’xejn ma setgħu jikkontrollawhom.
Sempliċiment infezzjoni li qabditu waslet biex Shawn spiċċa jissielet għal ħajtu għal ġimagħtejn sħaħ. Dan wara li b’riżultat tal-infezzjoni, il-pressjoni tinżel f’livelli inkwetanti ferm tant li spiċċa fil-periklu tal-mewt darbtejn.
Shawn irnexxilu jikkumbatti din l-infezzjoni iżda ħareġ minnha billi t-tobba kellhom ineħħulu parti minn idejh u saqajh it-tnejn sabiex ikunu jistgħu jsalvawlu ħajtu.
“Illum il-ġurnata sirt napprezza iktar il-ħajja”
Iżda minkejja dan kollu, id-determinazzjoni u l-pożittività ta’ Shawn ma tbattix. Id-determinazzjoni f’Shawn għenitu ferm iżda ħajtu tista’ tersaq eqreb għan-normal la darba jkollu drigħ artifiċjali tal-aħħar teknoloġija, liema teknoloġija tiswa’ l-eluf ta’ ewro.
Dan apparti li dan kollu wassal ukoll biex l-infezzjoni taffetwalu wkoll il-kliewi tant li għandu bżonn trasplant tal-kliewi.
X’inhi l-iktar ħaġa li Shawn iħoss in-nuqqas tagħha mill-ħajja barra Karin Grech, fejn illum il-ġurnata jinsab rikoverat?
“Bħalissa, l-iktar ħaġa li qed nimmisja li niftaħ il-bieb tad-dar tiegħi,” qal Shawn Mifsud.
Segwi hawn l-intervista sħiħa ma’ Shawn Mifsud:
https://www.facebook.com/watch?v=7504266399583930
