Tliet bouncers oħra ġew mixlija b’rabta mal-ġlied fil-ġurnata tas-sena l-ġdida f’Paceville li ħalliet raġel ferut gravi. F’kawża tad-distrett ta’ Tas-Sliema quddiem il-Maġistrat Ian Farrugia, l-Ispettur Brian Xuereb ressaq il-qorti liċ-ċittadini Serbi Ivan Marjanovic ta’ 46 sena u Aleksandar Kovacic ta’ 28 sena, li t-tnejn wieġbu ħatja li aggredew persuna u kisru l-paċi pubblika.
Huma ġew immultati €100 kull wieħed. It-tielet raġel li tressaq il-Qorti, Petar Bajic ta’ 36 sena, ukoll mis-Serbja, wieġeb mhux ħati. L-akkużi tal-Ħamis issa jġibu n-numru ta’ nies akkużati bl-attakk brutali għal ħamsa.
Ryan Zammit ta’ 29 sena, u l-Albaniż Riald Gragjevi, li għandu wkoll 29 sena, diġà ġew akkużati bi ġrieħi gravi u miżmuma taħt arrest preventiv. Ir-raġel li deher jiġi aggredit fil-filmat, Ahmed Adam Idriss Albarjo ta’ 30 sena mis-Sudan, sussegwentement ġie mixli wkoll fis-6 ta’ Jannar, li kkawża ġrieħi ħfief b’rabta mal-inċident, u kien inżamm taħt arrest preventiv. Hu kien preżenti fl-awla, akkumpanjat minn żewġ gwardjani tal-ħabs.
Albarjo informa lill-Qorti li kien qed jirrinunzja għad-dritt tiegħu għal azzjoni kriminali sal-limitu permess mil-liġi. F’kelma waħda hu ħafer lil tlieta minn dawk li aggredewh. L-irġiel li ammettew wieġbu ħatja tal-akkużi relatati mal-attakk u talbu skuża lill-parti midruba, li aċċettat l-apoloġija.
Fid-dawl tad-dikjarazzjoni, il-prosekuzzjoni ddikjarat li ma kellha l-ebda prova oħra x’tipproduċi.
Bajic ġie mixli wkoll li aġixxa illegalment ta’ gwardjan privat u mingħajr il-liċenzja meħtieġa, li għamel insulti u theddid u li kiser il-paċi pubblika b’għajjat u ġlied. Huwa wieġeb mhux ħati. Il-każ kontra Bajic ġie differit għal Mejju.
Ftit tal-minuti wara quddiem il-Maġistrat Nadine Lia kompliet il-kumpilazzjoni tal-provi fil-konfront tal-irġiel diġà akkużati b’rabta mas-swat, Rialj Gragjevic u Ryan Zammit. Kovacic xhed f’dak il-każ, u qal lill-qorti li kien jaħdem bħala gwardjan tas-sigurtà. Mistoqsi dwar l-inċident, huwa qal “Naħseb li huwa aħjar li ġġibuli lill-avukat tiegħi jitkellem dwar il-każ.”
Intervejna l-Ispettur Brian Xuereb, li rrimarka li Kovacic kien għadu kif instab ħati u mmultat, u għalhekk seta’ jixhed liberament, għax ma kienx qed jiffaċċja aktar investigazzjonijiet jew proċeduri legali dwar l-inċident.
Il-Prosekutur Etienne Savona mill-Uffiċċju tal-Avukat Ġenerali staqsa lil Kovacic dwar l-involviment tiegħu fl-inċident u x’jiftakar li ġara. “Kont involut f’dan l-inċident meta kien qed iseħħ il-każ hekk kif mort lura fil-klabb tiegħi wara. L-inċident kien qed jiġri barra l-klabb. Iva ħadt sehem u ntervjenejt f’dan l-inċident u mbagħad erġajt lura fil-klabb tiegħi.” Qal li l-klabb inkwistjoni kien Havana.
Kovacic qal li kien involut biss fil-bidu nett tal-inċident. “Intervjenejt għax sħabi ġew attakkati,” huwa qal, u żied li ma kien ra xejn wara li rritorna jagħmel xogħolu ġewwa l-klabb. Savona staqsa x’kien wassal għall-inċident.
“Ir-raġel ta’ kulur attakka raġel bi flixkun u baqa’ jagħtih bil-flixkun imkisser u nifed spalltu bih… Ir-raġel Albaniż, Riald, ġie attakkat bi flixkun imkisser. Ma rajtx kollox, rajt biss il-bidu ta’ battibekk u jien dħalt biss fin-nofs biex ngħin lill-kollegi tiegħi.”
Qal li reġa’ lura għad-dmirijiet tiegħu fil-klabb wara li ra li “erba’ jew ħamsa” mill-kollegi tiegħu kienu diġà qed jassistu lil Riald. L-Ispettur Xuereb staqsa kemm kienu ġew attakkati nies. B’mod aġitat Kovacic xejjar dirgħajh “ir-raġel ta’ kulur kien qed jhedded li joqtolna lkoll u jgħajjat. Imbagħad attakka lil Riald, il-bniedem Albaniż. Sa fejn stajt nara, Riald kien l-ewwel persuna li ġiet attakkata, iżda ma stajtx nara preċiżament minħabba l-ammont ta’ nies involuti.”
“Ir-raġel iswed mar ikellem lill-pulizija u beda jirreġistra kollox, imbagħad ġie lura. Wara dan, ma nafx. Smajt biss ‘barra’ ‘barra’ permezz tal-earphones tiegħi. Il-gwardjani tas-sigurtà li kienu mal-bieb kienu qed jgħiduli biex noħroġ barra. Kien hemm problemi kbar barra minħabba l-iswed… Meta mort barra, rajtu jiġri. L-uffiċjali tas-sigurtà rnexxielhom jaqbduh u l-kumplament inqabad fuq filmat.”
Albarjo xhed wara. Il-prosekuzzjoni qalet lill-Maġistrat Lia li r-raġel għandu jixhed b’kawtela, peress li kien qed jaffaċċja wkoll akkużi relatati mal-inċident. Il-Qorti spjegat lix-xhud li hu importanti li jifhem li dak kollu li kien se jgħid jista’ jintuża kontrih fil-proċeduri fejn kien akkużat. Dan kien ifisser li kellu dritt legali li ma jixhedx.
Albarjo talab li jitħalla jikkonsulta mal-avukat tiegħu, Roberta Bonello Felice, u tħalla jagħmel dan. Meta mar lura fl-awla, qal bl-Ingliż, “Irrid ninsa kollox. Ma rridx nagħti xhieda.” Petar Bajic, il-gwardjan tas-sigurtà li kien wieġeb mhux ħati aktar kmieni filgħodu, ġie msejjaħ biex jixhed, iżda wkoll irrifjuta minħabba l-proċeduri li għaddejjin kontrih.
L-avukati ta’ Bajic Shazoo Ghaznavi u Jessica Formosa spjegaw li minħabba l-iżviluppi ta’ filgħodu fil-Qorti, fejn ġie mixli li aġixxa bħala bouncer mingħajr liċenzja, jippreferi jixhed aktar tard, wara li ġew konklużi l-proċeduri kontrih.
L-Ispettur Xuereb intalab jixhed, iżda l-avukat Herman Mula, avukat difensur ta’ Gragjevic u Zammit, irrimarka li l-Ispettur ma setax jixhed mingħajr ma għamel referenza għal filmati tas-CCTV li kienu għadhom ma ġewx esebiti. Il-każ ġie differit għall-ġimgħa d-dieħla
