Il-qawwiet tal-Istati Uniti u r-Renju Unit, kmieni dalgħodu, wettqu l-akbar sensiela ta’ attakki fuq il-milizji tal-Houthi fil-Jemen…Dan meta l-milizji ilhom mill-aħħar ta’ Novembru jisparaw il-missili u d-drones lejn il-vapuri tal-merkanzija li qed jivvjaġġaw kontinwament mill-Baħar l-Aħmar.
L-Istati Uniti u r-Renju Unit kienu ilhom iwissu lill-Houthi – alleati tal-Iran – li kellhom jirreaġġixxu għall-azzjonijiet ostili tal-milizji. Fl-istess ħin l-osservaturi qablu li l-Houthi batew bil-kbir mill-attakki ta’ preċiżjoni fuq is-siti tagħhom fil-Jemen.
L-attakki — mill-ajru u mill-baħar — fuq il-Houthi laqtu talanqas 20 pożizzjoni fil-Jemen minfejn qed isiru l-attakki fuq il-bastimenti.
Fis-sigħat ta’ wara, il-President tal-Istati Uniti, Joe Biden, qal li l-azzjoni kontra l-Houthi għandha tipproteġi l-moviment ħieles tal-kummerċ internazzjonali mill-Baħar l-Aħmar.
Il-President Biden kompla li mhux se jibqa’ lura minn aktar azzjonijiet militari kontra l-Houthi f’każ li jkun neċessarju. Iżda l-Istati Uniti anki għamlitha ċara li ma tridx tara konflitt aktar mifrux madwar il-Lvant Nofsani u għaldaqstant hemm kull possibbiltà li azzjonijiet simili tal-Amerikani fil-futur għandhom ikunu pjuttost ‘limitati’.
Il-Houthi fil-Jemen ilhom is-snin jiġġieldu gwerra mal-koalizzjoni taħt it-tmexxija tal-Arabja Sawdija u għaldaqstant għandhom esperjenza kbira fejn jidħlu t-tattiċi u l-istrateġiji tal-gwerra.
Intant, sar magħruf li l-Olanda, l-Awstralja, il-Kanada u l-Bahrain ipprovdew appoġġ lill-missjoni militari tal-bieraħ kontra l-Houthi.
Min-naħa tiegħu, il-Prim Ministru Britanniku, Rishi Sunak, qal li l-attakki fuq il-Houthi, filwaqt li ‘limitati’, kienu neċessarji għad-difiża tal-bastimenti kummerċjali li bilfors iridu jbaħħru qrib il-Jemen.
Il-Houthi, fl-aħħar jiem, qalu li kienu qed jisparaw il-missili lejn il-bastimenti b’konnessjoni ma’ Iżrael u bħala appoġġ għall-grupp Palestinjan terroristiku Ħamas li ilu mis-7 ta’ Ottubru jiġġieled gwerra qalila mal-Iżraeljani.
Madankollu, spikkaw ukoll l-attakki indiskriminattivi mill-Houthi fuq il-bastimenti li qed ibaħħru taħt il-bnadar ta’ diversi pajjiżi — u bl-Istati Uniti, ir-Renju Unit u l-pajjiżi tal-Unjoni Ewropea jaqblu li għandu jsir minn kollox biex tispiċċa t-theddida għall-vapuri li huma strumentali għall-kummerċ globali
Sadanittant, il-Houthi, issa, ħalfu li l-aħħar attakki tal-Amerikani u l-Britanniċi fuq is-siti fil-Jemen mhumiex se jgħaddu ‘mingħajr xi forma ta’ ritaljazzjoni’. Il-Houthi, fl-istess ħin, ħalfu li se jkomplu bl-attakki fuq il-bastimenti fil-Baħar l-Aħmar waqt li jibqgħu jappoġġjaw lill-Ħamas fil-gwerra tagħhom mal-Iżraeljani.
