Is-serje televiżiva Succession kompliet is-sensiela ta’ rebħ, filwaqt li kisbet rebħiet kbar fl-Emmys ftit wara li rebħet fil-Golden Globes. Ir-raba’ u l-aħħar staġun tas-serje, kiseb il-premju għall-aqwa drama. Kieran Culkin u Sarah Snook, li jinterpretaw il-karattri tal-aħwa Roman u Shiv Roy, ġew onorati bħala l-aqwa attur u attriċi.
Fil-qasam tal-kummiedja, The Bear, serje ambjentata fi kċina ristretta ta’ chef, iddominat il-kategoriji, filwaqt li l-comedy-drama Beef ħareġ bħala r-rebbieħ li jispikka fil-grupp tal-limited series.
Farewell From Dodger Stadium rebaħ l-aqwa varjetà speċjali live, li mmarka l-ewwel nominazzjoni u premju għall-Emmy tal-kantant-awtur Brittaniku, Elton John.
Madankollu, Elton John ma setax jirċievi l-unur wara li dan l-aħħar kien operat f’irkopptu. Huwa kiteb fuq Instagram li kien “jinsab fis-seba’ sema” wara r-rebħa filwaqt li ċċajta li l-problema ta’ l-rkopptu jaf hija “tfakkira ġentili, ta’ kif qatta’ ħajtu jaqbeż minn fuq il-pjani”.
Rebbieħa oħra kienu jinkludu The White Lotus u Abbott Elementary.
Matul is-serata, waqt il-parti In Memoriam, Charlie Puth u The War and Treaty wettqu l-kollaborazzjoni ta’ Wiz Khalifa u Puth fl-2015, “See You Again“, fejn interpretaw parti wkoll minn “I’ll Be There for You,” it-theme song tas-serje popolari F.R.I.E.N.D.S., biex jonoraw lil Matthew Perry, li kien fost l-atturi kbar tat-televiżjoni li tlifna fis-sena li għaddiet.
