Raġel mis-Serbja residenti l-Mellieħa nżamm arrestat b’rabta mal-interċettazzjoni ta’ pakketti mill-posta li b’kollox allegatament kien fihom ħames kilos cannabis. L-Ispettur Jonathan Pace ressaq quddiem il-Maġistrat Gabriella Vella, żagħżugħ ta’ 26 sena.
Mladen Bjelica kien akkużat li importa erba’ pakketti li fihom 1kg ħaxixa tal-cannabis kull wieħed, kompliċità u konfoffa biex tiġi importata d-droga, leima pussess huwa f’ċirkostanzi li juru li ma kinitx għall-użu personali tiegħu. Ġie mixli wkoll bil-kultivazzjoni ta’ pjanti tal-cannabis, bi ksur tal-Att dwar id-Drogi Perikolużi.
Ir-reati huma allegati li seħħew lejn l-aħħar ta’ Diċembru u fil-ġimgħat u x-xhur ta’ qabel. L-Ispettur Pace qal li fis-27 ta’ Diċembru 2023, l-uffiċċju tiegħu kien irċieva rapport mid-Dwana li kienu waslu żewġ pakketti b’suspett li kien fihom 500g ħaxixa tal-cannabis. Wara li Maġistrat inkwerenti approva konsenja kkontrollata, l-ispettur, mar bil-moħbi taparsi mpjegat tal-MaltaPost, u mar iwassal il-pakkett.
“Malli dħalt fit-triq, żewġ individwi kienu bdew isegwu l-vann. Staqsewni jekk kellix xi pakkett għal Mladen Bjelca,” qal l-ispettur, li wieġeb fl-affermattiv, qabel ma wettaq il-konsenja kkontrollata, b’Bjelca jiffirma għall-pakkett hu stess.
Wara li r-raġel ġie arrestat, mid-dar tiegħu nstabu 14-il pjanta oħra tal-cannabis, qal l-ispettur, li żied li ġew interċettati wkoll pakketti oħra simili, fosthom tnejn identiċi li ġew indirizzati lil Mladen. Il-kontenut tal-pakketti kien iddikjarat bħala ingwanti tal-boxing u ornamenti tas-siġar tal-Milied.
Bjelica kien ikkopera bis-sħiħ mal-pulizija mill-mument tal-arrest tiegħu, qal l-ispettur. Bjelica, li qal lill-Qorti li jaħdem bħala ‘electrician’, wieġeb mhux ħati tal-akkużi. Fuq l-assi tiegħu ġiet imposta ordni ta’ ffriżar, bl-avukat difensur Charles Mercieca jitlob li l-klijent tiegħu jitħalla jaċċessa l-ammont ta’ €13,900 permess mil-liġi għall-ispejjeż tal-għajxien tiegħu.
L-avukat argumenta li l-kwistjoni kienet il-kapaċità tal-imputat li jirrispetta l-kundizzjonijiet tal-libertà proviżorja tiegħu. Ix-xhieda ma kinux suġġetti għall-indħil mill-akkużat, huwa qal, filwaqt li sostna li l-fatturi msemmija mill-prosekuzzjoni ma kellhom ebda effett fuq l-għoti tal-libertà proviżorja.
Il-Qorti, madankollu, ċaħdet it-talba għal libertà proviżorja bħala prematura f’dan l-istadju, fid-dawl tal-investigazzjonijiet li kienu għaddejjin u l-fatt li xhieda ċivili għad iridu jixhdu. Il-maġistrat talbet lill-prosekuzzjoni biex tikkonkludi l-investigazzjonijiet tagħha u tressaq ix-xhieda tagħha kemm jista’ jkun malajr.
