Charlot Farrugia ta’ 39 sena minn Santa Luċija nżamm arrestat wara li allegatament kiser il-kundizzjonijiet tal-ħelsien mill-arrest, filwaqt li għamel żmien fuq il-lista ta’ persuni mfittxija.
Il-Prosekuzzjoni spjegat kif Farrugia kien ilu diversi xhur ma jiffirma l-għassa. Fl-aħħar ġranet il-Pulizija tal-Komunita’ infurmawh li bdew jaraw lil imputat fl-inħawi tal-Qawra, u b’dan inħareġ mandat ta’ arrest fil-konfront ta’ Farrugia.
Hu ġie arrestat kemm talli kiser il-kundizzjonijiet tal-ħelsien mill-arrest, kif ukoll għax kellu fil-pussess tiegħu ammont ta’ boroż suspettati tal-kokaina u eroina.
Farrugia wieġeb mhux ħati għall-akkużi miġjuba kontrih, filwaqt li nżamm arrestat, hekk kif id-Difiża ma għamlet ebda talba għall-ħelsien mill-arrest.
