It-Tnejn filgħaxija tħabbret il-mewt tal-aqwa skorer tat-tim Nazzjonali Taljan ta’ kull żmien Gigi Riva.
Huwa kellu 79 u miet fit-taqsima tal-kardjoloġija tal-isptar Brotzu f’Cagliari.
Bejn l-1965 u l-1974 mat-tim Nazzjonali Taljan fi 42 partita skorja 35 gowl.
Beda l-karriera ma’ Legnano fl-1962/63 fejn fi 23 partita skorja 6 gowls. Fl-1963 ingħaqad ma’ Cagliari fejn dam sal-1976 bil-qofol tal-karriera jkun ir-rebħ tal-Kampjonat tas-Serie A fl-1969/70. Kien tlett darbiet bħala l-aqwa scorer tal-Kampjonat tas-Serie A fejn ma’ Cagliari fi 315-il partita skorja 164 gowl.
Mat-tim Nazzjonali Taljan kien rebaħ il-Kampjonat tal-Ewropa fl-1968 fejn fil-finali kontra l-Jugoslavja kien skorja wieħed miż-żewġ gowls tal-Italja.
Kien ukoll fit-tim li fl-1970 tilef il-finali tat-Tazza tad-Dinja kontra Brazil.
Bejn l-1988 u l-2013 il-Federazzjoni Taljana tal-Futbol kienet ħatritu bħala manager responsabbli mit-tim nazzjonali.
