L-armata Iżraeljana qalet li 24 suldat Iżraeljan inqatlu f’Gaza, f’dak li qed jiġi deskritt bħala l-aktar jum imdemmi għall-forzi Iżraeljani sa mill-bidu ta’ din il-gwerra.
Daniel Hagri, kelliem għall-Forza tad-Difiża Iżraeljana, qal illi minkejja li d-dettalji ta’ dan l-attakk għadhom qed jiġu investigati … huwa mifhum li s-suldati inqatlu kaġun ta’ bomba li laqtet tank viċin żewġ binjiet, fejn kien hemm dawn l-istess suldati.
B’kollox, huwa stmat li 25,295 persuna tilfu ħajjithom f’Gaza sa mill-bidu ta’ Ottubru, bil-maġġoranza ta dawn il-vittmi jkunu nisa u tfal.
Intant kmien filgħodu, ftit wara t-tmien attakk tal-Istati Uniti u t-tieni wieħed f’opperazjoni konġunta mar-Renju Unit fuq il-Houti fil-Jemen, kelliem għall- Pentagon qal li dawn kienu attakki sabiex jipproteġu l-ħajjiet tac-civili. U għalhekk, mhux se jkunu qed jaħsbuha darbtejn sabiex ikomplu b’attakki simili.
Il-Houti huma grupp ta’ ribeli li igawdu l-appoġġ tal-Iran u li jikkontrollaw parti kbira mill-Jemen fil-kosta tal-Baħar l-Aħmar.
Mindu bdiet il-gwerra f’Gaza, il-Houti attakkaw numru kbira ta’ vapuri tal-merkanzija li kienu għaddejin mir-rotta tal-baħar l-aħmar – inkluż bastiment li kien itajjar bandiera Maltija.
Il-Houti qegħdin jgħidu li huma qed jattakkaw biss vapuri li jkollhom rabta ma’ Iżrael sabiex juru solidarjeta mal-Palestinjani; madanakollu huma attakkaw ukoll numru ta’ bastimenti li ma kellhom l-ebda konnesjoni ma Iżrael.
David Cameron, is-Segretarju tal-Affarijiet Barranin tar-Renju Unit qal li l-attakki tal-Houti fil-Baħar l-Aħmar huma innaċettabli u illegal, waqt li żied jgħid li n-narrativa tal-Houti m’ghandix tiġi accettata.
Minn naħa tagħhom il-Houti qalu li l-attakki tal-Istati Uniti u r-Renju Unit mhux se jintesew. Il-Ministru tal-affarijiet barranin tal-Iran minn naha tieghu qal li dawn l-attakki huma ta’ thedida għal paċi u s-sigurta tar-reġjun.
