L-Avukat tal-Istat irid li l-Imħallef Giovanni Grixti jirtira r-rekuża tiegħu minn kawża mressqa mill-Kap tal-Partit Nazzjonalista Bernard Grech u mix-Shadow Minister Adrian Delia, filwaqt li qed jinsisti li d-digriet mogħti nhar it-Tnejn kien proċeduralment żbaljat.
Fi stqarrija ġuramentata nhar it-Tlieta, l-Avukat tal-Istat Chris Soler qal li l-imħallef ma mexiex il-proċedura korretta u b’hekk ċaħdet lill-partijiet fil-każ iċ-ċans li jagħmlu sottomissjonijiet. Nhar it-Tnejn l-Imħallef Grixti kien mistenni li jagħti sentenza dwar jekk il-Prim Ministru u l-Kabinett tiegħu jistgħux jingħaqdu mal-kawża li nfetħu Bernard Grech u Adrian Delia kontra l-Avukat tal-Istat.
Il-Partit Nazzjonalista jrid li l-qorti tordna lill-Avukat tal-Istat biex jibda azzjoni legali biex jirkupra l-miljuni ta’ ewro li tħallsu lil Vitals u Steward Healthcare bħala parti mill-ftehim tal-isptarijiet. Il-ftehim kien ġie annullat kemm mill-Qorti Kostituzzjonali kif ukoll mill-Qorti tal-Appell, fejn nstab li d-deal kien wieħed frawdolenti bil-Gvern ikun ukoll f’kollużjoni ma’ din is-serqa.
Il-Gvern kien talab li jkun parti fil-każ iżda meta wasal iż-żmien tad-deċiżjoni nhar it-Tnejn, l-Imħallef ħabbar li kien qed jirrikuża ruħu għax minn dak iż-żmien s-sieħba tiegħu kienet inħatret kuratur ta’ Steward fuq att li ħassar il-kuntratt oriġinali. Steward kien nieqes mill-att u għalhekk kellu jinħatar kuratur. F’dawn iċ-ċirkostanzi l-irwol tal-kuratur huwa ta’ importanza minima.
Minkejja dan, l-Imħallef Grixti ddeċieda li jkun aħjar għalih li jitbiegħed mill-każ biex jevita kull kunflitt ta’ interess minkejja li ż-żewġ partijiet esprimew fiduċja fih waqt seduta aktar kmieni dan ix-xahar. L-avukati ta’ Grech u Delia kienu qajmu l-punt li qarib tal-Imħallef li issa mejjet kien fil-kapaċità medika tiegħu ġie mitlub mill-gvern biex jagħmel ‘due diligence’ fuq l-aspett mediku tal-ftehim.
Madankollu, eventwalment qablu li l-Imħallef għandu jkompli jisma’ l-każ. Fid-dikjarazzjoni ġuramentata tiegħu, l-Avukat tal-Istat qal li l-Imħallef kellu l-ewwel jinforma lill-partijiet qabel ir-rikuża tiegħu. Il-liġi tistipula li l-Imħallef jista’ jkompli jisma’ l-kawża jekk il-partijiet jagħtu l-kunsens tagħhom għalkemm xorta jista’ jirrikuża ruħu jekk iħoss li għandu jagħmel dan.
“Biex digriet tal-qorti jkun leġittimu, irid ikun proċeduralment korrett… il-liġi teħtieġ li tingħata deċiżjoni qabel is-seduta, il-partijiet jiġu nnotifikati u jingħataw l-opportunità li jagħmlu s-sottomissjonijiet tagħhom stess,” qal l-Avukat tal-Istat. Dr. Soler talab lill-qorti biex tirrevoka d-digriet tar-rekuża u ssegwi l-proċeduri stabbiliti fil-liġi.
