L-ogħla qorti tan-Nazzjonijiet Uniti se tagħti deċiżjoni nhar il-Ġimgħa dwar it-talba tal-Afrika t’Isfel għal ordnijiet interim f’każ ta’ ġenoċidju kontra Iżrael, inkluż li Iżrael iwaqqaf l-offensiva tiegħu f’Gaża. Id-deċiżjoni hija stadju preliminari ta’ każ ippreżentat mill-Afrika t’Isfel fil-Qorti Internazzjonali tal-Ġustizzja fejn allega li l-azzjoni militari ta’ Iżrael fil-gwerra tiegħu mal-Ħamas f’Gaża tammonta għal ġenoċidju.
Iżrael jirrifjuta bil-qawwa l-akkuża u talab lill-qorti ta’ The Hague, fl-Olanda biex tarmi l-każ. Il-Gvern tal-Afrika t’Isfel qal li l-Ministru tal-Affarijiet Barranin Naledi Pandor se jivvjaġġa lejn The Hague biex jirrappreżenta lill-pajjiż fid-deċiżjoni tal-Ġimgħa.
L-Iżrael nieda l-attakk enormi tal-ajru u tal-art tiegħu fuq Gaża ftit wara li l-militanti tal-Ħamas daħlu fil-komunitajiet Iżraeljani fis-7 ta’ Ottubru u qatlu madwar 1,200 ruħ, l-aktar ċivili. L-Iżrael spiss jibbojkottja t-tribunali internazzjonali u l-investigazzjonijiet tan-NU, billi jgħid li huma inġusti u preġudikati.
Iżda l-mexxejja tal-pajjiż bagħtu tim legali ta ‘livell għoli għal jumejn ta’ seduti aktar kmieni dan ix-xahar. Dan kien sinjal ta’ kemm iqisu l-każ bis-serjetà u indikazzjoni ta’ tħassib probabbli li kwalunkwe ordni tal-qorti biex jitwaqqfu l-operazzjonijiet tkun daqqa ta’ ħarta kbira għall-pożizzjoni internazzjonali tal-pajjiż.
