Il-Qorti Ewlenija tan-Nazzjonijiet Uniti għadha kemm iddeċidiet li Iżrael għandu jieħu l-miżuri kollha biex jevita azzjonijiet ta’ ġenoċidju (il-qerda ta’ poplu) fil-Medda ta’ Gaza.
Madankollu, din il-Qorti ma ħarġitx direttiva ċara biex il-qawwiet Iżraeljani jwaqqfu l-offensiva attwali kontra t-terroristi tal-grupp Ħamas fit-territorju partikulari u li ilha mis-7 ta’ Ottubru.
Dan kien ir-riżultat proviżorju tal-proċess li, għall-aħħar ġimgħat, kien evalwat mill-Imħallfin tal-Qorti Internazzjonali għall-Ġustizzja – u wara li l-Afrika t’Isfel kienet ressqet każ ta’ ġenoċidju kontra Iżrael.
Fil-fatt, verdett uffiċjali dwar l-allegazzjoni ta’ ġenoċidju min-naħa tal-Afrika t’Isfel mhux mistenni li joħroġ għal diversi snin.
Intant, Iżrael hu ferm irrabjat dwar l-akkuża u qed jiċħad kategorikament li qed iwettaq xi forom ta’ ġenoċidju f’Gaza. Fl-istess ħin, l-Iżraeljani qegħdin ifissru l-każ kontra tagħhom bħala wieħed mingħajr bażi.
Fi żviluppi oħra, ir-rapporti mill-Istati Uniti qalu li l-Kap tas-CIA Amerikana, William Joseph Burns, fil-jiem li ġejjin, għandu jiltaqa’ mal-Uffiċjali ta’ Iżrael, il-Qatar u l-Eġittu biex flimkien jiddiskutew ftehim potenzjali (ieħor) għall-waqfien tal-battalji fil-Medda ta’ Gazza.
