Filwaqt li ma kienx hemm logħob mill-Kampjonat tal-Ewwel Diviżjoni tal-Malta Table Tennis association, l-attenzjoni kienet fuq dak tat-tieni diviżjoni fejn żewġ timijiet jinsabu jaqsmu l-ewwel post fil-klassifika b’31 punt.
PBC Table Tennis Bluegrip u Alpha Alberta Group it-tnejn rebħu bl-iskor identiku ta’ 4-2 kontra HITT Academy ITX u Top Spin Table Tennis Academy Valletta Pay Fraser rispettivament. Iż-żewġ timijiet għandhom distakk ta’ erba’ punti vantaġġ fuq l-eqreb rivali Top Spin Table Tennis Valletta Academy Pay Hexer li min-naħa tagħhom iddominaw il-partita tagħhom kontra Top Spin TT Academy Pay Novacell b’rebħa ta’ 6-0.
Top Spin Table Tennis Academy Pay Supercores għelbu lil PBC Table Tennis Bluefire 4-3 filwaqt li HITT Academy Valletta għelbu lil HITT Academy Legends 6-0.
B’hekk intemm l-ewwel round ta’ kull diviżjoni, bil-kampjonat jinqasam u jkompli bit-tieni round fejn l-ewwel sitt timijiet se jkunu qed jissieltu għar-rebħ tal-kampjonat filwaqt li mill-aħħar grupp ta’ timijiet ikun deciż min ikun relegat.
