L-Iran qed jiċħad kategorikament li kien involut f’attakk bid-drones li sewa l-ħajja ta’ almenu tliet suldati Amerikani — b’madwar 40 militar oħra jisfaw midruba b’riżultat tal-istess azzjoni.
L-attakk ikkonċentra fuq bażi militari tal-Istati Uniti fil-Ġordan, qrib il-fruntiera mas-Sirja. Dan ukoll meta l-President Amerikan, Joe Biden, qed jakkuża (għall-attakk) lill-gruppi tal-militanti bażati fl-Iraq u fis-Sirja u li qed jingħataw l-appoġġ mingħand l-Iran.
Intant, kollox qed jidher lest għal forma ta’ ritaljazzjoni min-naħa tal-Istati Uniti, bil-President Biden jinsisti li pajjiżu għandu jaċċerta li l-elementi responsabbli għal din l-aggressjoni se jieħdu li ħaqqhom fiż-ħmien opportun.
Il-Gvern Amerikan għamilha ċara li mhux se jaċċetta azzjonijiet ostili ta’ dan it-tip fil-konfront tal-militar tiegħu stazzjonati fl-Iraq u bnadi oħra tal-Lvant Nofsani. Għaldaqstant, jidher li l-President Biden, issa, se jkollu dilemma dwar il-forma ta’ ritaljazzjoni f’dawn iċ-ċirkustanzi. Dan għaliex attakk dirett fuq l-Iran għandu jwassal għal eskalazzjoni enormi tal-kriżi fil-Lvant Nofsani u fi żmien meta l-gwerra bejn Iżrael u t-terroristi tal-Ħamas f’Gaza għadha intensiva daqs qatt qabel.
Min-naħa tiegħu, il-Ministeru Iranjan għall-Affarijiet Barranin fisser l-akkużi tal-Amerikani bħala ‘mingħajr bażi’ filwaqt li stqarr li l-akkużi huma kollha parti minn allegat kumplott intiż biex l-Istati Uniti tidħol direttament fil-konflitt tal-Lvant Nofsani.
Din hi anki l-ewwel darba li nqatlu suldati Amerikani b’kaġun tal-attakki fil-Lvant Nofsani mindu l-Ħamas wettqu l-attakki terroristiċi storiċi tas-7 ta’ Ottubru fuq il-komunitajiet ta’ Iżrael viċin il-fruntiera ta’ Gaza.
Fl-aħħar żviluppi, il-grupp bl-isem Reżistenza Iżlamika assuma responsabbiltà għall-attakk fuq il-bażi tal-Amerikani fil-Ġordan. Din l-entità tikkonsisti minn diversi milizji affiljati mal-Iran u li ilhom żmien jikkonsolidaw il-pożizzjonijiet tagħhom fl-Iraq. Il-milizji, fl-aħħar ġimgħat, ukoll kienu ħadu responsabbiltà għal azzjonijiet oħra ostili kontra l-qawwiet Amerikani fl-Iraq.
