Imħallef sejjaħ seduta urġenti fil-kawża kostituzzjonali mressqa minn Keith Schembri wara li espert tal-qorti li xehed fi proċeduri separati kontra Yorgen Fenech tkellem dwar is-sejba ta’ siġilli miksura fuq il-borża tal-provi tal-esebit.
Dan joħroġ minn rikors fil-Qorti mressqa mill-avukati Edward Gatt, Mark Vassallo u Shaun Zammit, li qed jirrappreżentaw lil Schembri, iċ-chief of staff tal-eks Prim Ministru Joseph Muscat. Schembri qed isostni li l-mowbajl tiegħu kien sparixxa mill-evidenza.
L-Imħallef Mark Simiana, li jippresiedi l-Prim’Awla tal-Qorti Ċivili fil-ġurisdizzjoni kostituzzjonali tagħha sussegwentement ħareġ digriet, li ressaq is-seduta li jmiss għat-2 ta’ Frar u ordna lill-espert tal-qorti Martin Bajada, li kien irrapporta s-siġilli miksura waqt il-kawża ta’ Fenech, biex jixhed.
Ir-rikors jgħid li Bajada kien qal lill-maġistrat tal-kumpilazzjoni li kien tal-opinjoni li l-provi kienu ġew imbagħbsa. L-Imħallef ordna wkoll li l-esebit inkwistjoni ma jingħatax lil ħaddieħor għal xi raġuni, sakemm il-qorti tiegħu tagħti permess biex jagħmel dan.
Schembri kien ippreżenta l-każ f’Novembru li għadda, sostna li kien hemm ksur tad-dritt tiegħu għal smigħ xieraq u talab li t-telefon jitneħħa mill-evidenza, allega li l-mobajl kien għeb għal diversi ġimgħat, qabel ma tfaċċa fost l-esebiti f’każ separat.
Din l-allegazzjoni ġiet miċħuda mill-maġistrat li ġabret provi kontra Schembri, u tat ukoll rendikont ta’ dak li kien ġara mill-apparat, f’dawk il-proċeduri, li fihom Schembri jinsab akkużat b’tixħim u ħasil ta’ flus.
