Liverpool ikkonsolidaw l-ewwel post b’rebħa meritata ta’ 4-1 fuq Chelsea f’Anfield.
Protagonista fir-rebħa kien id-difensur laterali lemini ta’ 20 sena Conor Bradley fejn sab ix-xibka u kiseb żewġ assists.
Ir-Reds kellhom wirja impressjonanti, b’ Diego Jota jkun l-ewwel li jsib ix-xibka wara 23 minuta logħob b’konklużjoni fir-rokna t’isfel tal-lemin mill-assist ta’ Conor Bradley.
L-istess żagħżugħ Conor Bradley kien l-awtur tat-tieni gowl għal Liverpool, bil-konklużjoni tiegħu taħbat max-xibka fid-39 minuta.
Liverpool skorjaw it-tielet gowl fil-65 minuta permezz tal-midfielder Dominik Szoboszlai minn assist ieħor ta’ Conor Bradley.
Chelsea skorjaw gowl lura permezz ta’ Christopher Nkunku fis-71 minuta, madankollu l-gowl tal-Franċiż ma kienx biżejjed għar-rimonta.
Liverpool komplew ikabbru l-iskor fid-79 minuta permezz ta’ gowl minn Luis Diaz, din id-darba jasal mis-suġġeriment ta’ Nunez.
Manchester City komplew il-pressjoni fuq Liverpool b’rebħa fl-Etihad Stadium ta’ 3-1 fuq Burnley.
Żewġ gowls fl-ewwel taqsima għas-Citizens, b’ Julian Alvarez isib ix-xibka darbtejn fos-16-il minuta u fit-22 minuta, segwit minn gowl minn barra l-kaxxa tal-midfielder Rodri minuta wara l-bidu tat-tieni taqsima.
Burnley skorjaw gowl ta’ konsolazzjoni fit-93 minuta minn konklużjoni mill-viċin ta’ Ameen Al Dakhil.
Partita daqsxejn iktar kumbattuta, fejn Tottenham Hotspur dawwru telfa f’rebħa kontra Brentford bl-iskor finali jkun ta’ 3-2.
Brentford fetħu l-iskor wara kwarta logħob permezz tal-attakkant Franċiż Neal Maupay minn kontrattakk veloċi.
Żewġ gowls f’żewġ minuti għal Tottenham, bl-ewwel gowl jasal fit-48 minuta mid-difensur laterali Destiny Udogie, segwit minn gowl ta’ Brennan Johnson mis-suġġeriment ta’ Werner.
Fis-57 minuta Richarlison kien l-awtur tat-tielet gowl għal Tottenham.
Għaxar minuti wara Brentford sabu x-xibka għal darb’oħra din id-darba permezz ta’ Ivan Toney, madankollu ma rnexxielhomx idawwru r-riżultat favurihom.
It-Tlieta
Nottingham F. v Arsenal 1-2
Luton T. v Brighton 4-0
Fulham v Everton 0-0
Crystal P.v Sheffield U. 3-2
A.Villa v Newcastle U. 1-3
Illum
Man. City v Burnley 3-1
Tottenham H. v Brentford 3-2
Liverpool v Chelsea 4-1
Għada
West Ham U. v Bournemouth 8:30pm
Wolves v Man Utd. 9:15pm
