Neil Camenzuli
VALLETTA ……………………………… 1
SLIEMA WANDERERS …………… 1
Valletta: A.Guarnone, J.Bolanos, E.Ruiz (M.Jezdimirovic 82’), O.Barrientos, S.Dimech (K.Ewurum 61’), G.Braganca, F.Falcone (A.Ferrarris 40’), D.Paiber, L.Prestes, A.Micallef, D.Cardoso
Sliema W: R.Al Tumi, J.Borg (N.Frendo 90′), J.Minala, S.Gomes (J.Adukor 84’), G.Alcino, E.Agius (M.Scerri 77’), D.Kondrakov (A.Awad 71’), D.Kouao, H.Freire, G.Acheompong
Imwissija: A.Micallef 32’ (V)
Skorjaw: S.Gomes 55’ (S), J.Borg (AG) 67’
Referee: Philip Farrugia
Assistenti Referees: Robert Curtis u Alan Camilleri
BOV Plejer tal-Logħba: G.Acheampong (S)
Il-Mument Plejer tal-logħba: G.Acheampong (S)
Fit-Tony Bezzina Stadium, Sliema kellhom it-tieni draw konsekuttiv, din id-darba kontra Valletta. Punt missielet għal Valletta li wasal mill-autogowl ta’ Jean Borg fit-tieni taqsima wara li Gomes fetaħ l-iskor ftit qabel.
Sliema jinsabu fit-tielet post b’total ta’ 30 punt, fejn minkejja l-isforzi tagħhom matul il-partita huma ġew miċħuda minn tlett punti mistħoqqa, fejn minn naħa l-oħra punt preżżjuż għall-Beltin li ma kellhomx l-ewwel nofs staġun mill-aqwa. Valletta jinsabu b’total ta’ 18-il punt wara 15-il logħba, bl-impenn li jmiss fil-kampjonat ikun kontra Birkirkara.
L-ewwel azzjoni denja ta’ nota waslet wara 11-il minuta logħob minn azzjoni personali maħduma tajba mil lemin mill-captain ta’ Valletta Shaun Dimech li b’ħeffa daħal fil-kaxxa u pprova jegħleb lill-goalkeeper fuq l-ewwel lasta, b’ Al Tumi jevita l-periklu tajjeb.
Fil-21 minuta, Geoffrey Acheampong ra l-freekick ċentrali tiegħu jgħaddi għoli wisq.
Minuta wara, l-akkwist il-ġdid ta’ Sliema Wanderers Daniil Kondrakov ittanta xortih minn barra l-kaxxa, bit-tentattiv jisalva minn Guarnone.
Wara nofsija logħob, freekick ieħor perikoluż għas-Sliemiżi din id-darba mogħti minn Edmond Agius mix-xellug, bix-xutt imdawwar jgħaddi ftit barra mill-lasta.
L-ewwel taqsima tintemm 0-0, bl-ebda mit-timijiet ma joħolqu ċansijiet perikolużi biżżejjed.
Valletta ħarġu fuq l-offensiva fit-tieni taqsima, hekk kif fit-53 minuta s-sostitut Ferraris irċieva l-kross mix-xellug ta’ Prestes u ma rnexxielux jegħleb lil goalkeeper bir-ras.
Fil-55 minuta Sliema Wanderers skorjaw il-gowl tant mistenni meta l-attakkant Brażiljan Samuel Gomes b’ġirja daħal fil-kaxxa u kompla ġewwa mill-pass ta’ Geoffrey Acheampong għat-tielet gowl personali tal-istaġun.
Minuta wara Valletta rrispondew b’attakk perikoluż, pero Al Tumi jsalva tajjeb it-tentattiv mill-viċin ta’ Cardoso.
Valletta għamlu l-iskor indaqs fis-67 minuta permezz ta’ autogowl mid-difensur Jean Borg li xeħet fix-xibka tiegħu stess mill-kross ta’ Ferraris mix-xellug.
L-aħħar għoxrin minuta intensivi għaż-żewġ timijiet madankollu l-ebda tim ma rnexxielu joħloq azzjoni ta’ gowl denja ta’ nota, bil-partita tintemm f’parità ta’ gowl kull wieħed.
