Ħamrun Spartnas żammew il-quċċata tal-klassifika tal-Kampjonat BOV Premier b’rebħa konvinċenti ta’ 4-1 fuq Naxxar Lions. Din kienet rebħa ta’ kontinwità mill-Ispartans wara dik ta’ 7-1 kontra Balzan il-ġimgħa li għaddiet. Aktar minn hekk huma ngħataw aħbar tajba oħra lejn tmiem il-ġimgħa meta l-protest li għamlu Hibernians dwar Christian Rutjens ma’ ġiex milqugħ. Kienet logħba li Ħamrun fetħu tajjeb mill-ewwel iżda Naxxar Lions kisbu l-gowl tad-draw fejn ħasduhom xi ftit, iżda fit-tieni 45 minuta l-Ispartans kienu dominanti biex għal darb’oħra rebħu b’mod konvinċenti. Jidher li t-tim immexxi minn Luciano Zauri jinsab fl-aqwa forma bħalissa fejn minkejja li l-vantaġġ fuq it-tieni tim klassifikat, Floriana huwa wieħed minimu, xorta huma l-favoriti li jżommu t-titlu.
Logħba ferm kumbattuta kienet dik bejn Floriana u Birkirkara, prattikament il-partita prinċipali tal-15-il ġurnata tal-Kampjonat. Floriana irnexxielhom jieħdu tliet punti ferm importanti hekk kif għelbu lit-tim diffiċli ta’ Birkirkara bl-iskor ta’ 2-1. Logħba li rat lit-tim ta’ Mauro Camoranesi jkompli jsaħħaħ it-tieni post tal-klassifika. Wara li fl-ewwel round Floriana kienu għelbu lill-Istripes bl-iskor ta’ 2-0, din id-darba l-kompitu kien aktar diffiċli. Logħba li Floriana fetħu l-iskor iżda wara li Birkirkara kisbu d-draw baqgħu jemmnu biex fl-aħħar minuti tal-logħba kisbu l-gowl tar-rebħa mis-solitu Kemar Reid. Il-Greens kienu l-aktar tim attiv fis-suq tat-trasferimenti f’Jannar bl-akkwist ta’ ħames players fejn żgur li jridu jkunu armati sa’ snienhom għall-aħħar parti tal-istaġun. Birkirkara jidher li ser ikun staġun ta’ tim f’nofs il-klassifika jekk ma’ jseħħx bħas-sena li għaddiet u jsalvaw ġildhom bl-FA Trophy.
Hibernians kisbu d-double fuq il-ġirien Santa Lucia hekk kif huma rebħu bl-iskor ta’ 2-0 wara li fl-ewwel round Hibernians kienu rebħu l-konfront bir-riżultat ta’ 3-2. Tliet punti oħra importanti għall-Pawlisti fit-tentattiv li jkomplu jisfidaw għal post fl-Ewropa. Għal Santa Lucia din kienet it-tieni telfa konsekuttiva wara serje ta’ riżultati pożittivi li għenuhom sabiex jinqalgħu minn qiegħ il-klassifika. Kollox ma’ kollox kien riżultat ġust fejn għal Hibernians sab ix-xibka għat-tieni ġimgħa konsekuttiva ż-żgħażugħ Lucas Caruana. Aktar minn hekk huwa ġie magħżul bħala l-BOV Player tal-Logħba. Riżultat li jkompli jqawwi qalb il-Pawlisti filwaqt li għas-Saints kien xi ftit diżappuntanti iżda issa jdawru ħarsithom mill-ewwel lejn il-logħba tat-Trophy ta’ nhar il-Erbgħa kontra Mgarr United.
Punt kull naħa għal Mosta u Sirens f’logħba bejn żewġ timijiet fin-naħa t’isfel tal-klassifika. Logħba li ma’ pproduċiet ebda gowl u ftit li xejn azzjonijiet u li kkonfermat li ż-żewġ naħat mhux qegħdin fil-pożizzjoni li jinsabu fiha b’kumbinazzjoni. Matul ix-xahar ta’ Jannar Sirens ma żiedu l-ebda plejer fejn din tista’ tkun indikazzjoni li jinsabu rassenjati li jkunu relegati. Fil-fatt nemmen li ftit hemm tama minkejja għadhom jistgħu matematikament isalvaw. Mill-wirjiet li qed jagħtu bħalissa jidher li hemm xi ħaġa mhux qed tiffunzjona. Fl-ewwel round il-konfront ta’ bejniethom kien spiċċa fi draw ukoll iżda ta’ 1-1. Mosta wkoll iridu jkunu kawti filwaqt li jżidu fil-wirjiet tagħhom peress li minkejja barra miż-żona l-ħamra xorta waħda jinsabu fil-periklu.
Wara taqsima bla gowls, Valletta u Sliema Wanderers temmew it-tieni 45 minuta b’gowl biex ħadu punt kull wieħed li kkonsolida t-tielet post tas-Slimiżi. Mill-banda l-oħra għat-tim mill-Kapitali dan kien punt ieħor importanti fit-tentattiv li jkomplu jinqalgħu min-naħa t’isfel tal-klassifika. Issa Valletta ilhom tlett logħbiet bla telfa fil-Kampjonat filwaqt li għal Sliema dan kien riżultat pożittiv ieħor. It-tragward tal-Blues jibqa dejjem dak li jiksbu post fl-Ewropa li jekk jintlaħaq ikun suċċess kbir għalihom hekk kif huma għadhom kif ġew promossi miċ-Challenge League. It-tnejn li huma jkunu mpenjati matul din il-ġimgħa fit-Trophy b’Valletta jaffrontaw lil Mosta filwaqt li Sliema Wanderers għandhom għadma xi ftit aktar iebsa meta jiffaċċjaw lil Balzan.
Marsaxlokk irritornaw għar-rebħ wara li għelbu lil Gudja bl-iskor ta’ 2-1. Marsaxlokk kienu qegħdin ifittxu li jiksbu tlett punti minn din il-partita wara li kisbu tlett riżultati ta’ draw konsekuttivi fit-tlett logħbiet preċedenti. Għal Gudja din kienet il-ħames telfa konsekuttiva fejn jiqbgħu l-unika tim bla rebħa fil-Kampjonat Premier. It-tim immexxi minn Winston Muscat, wieħed mir-revelazzjonijiet tal-istaġun mill-ewwel urew l-intenzjonijiet tagħhom fejn ħarġu fuq l-offensiva u bnew vantaġġ doppju sas-siegħa logħob. Kien biss fil-ħin mogħti żejjed li l-avversarji tagħhom sabu x-xibka, li iżda rriżulta tard wisq biex isalvaw il-logħba. Fl-ewwel round iż-żewġ timijiet ħadu punt kull wieħed hekk kif spiċċaw fi draw ta’ 1-1.
Finalment draw ta’ 1-1 bejn Gżira United u Balzan, riżultat li ftit ibiddel il-klassifika taż-żewġ timijiet. Balzan kienu ġejjin mill-akbar telfa fil-kampjonat wara li l-ġimgħa li għaddiet sfaw megħluba minn Ħamrun Spartans bl-iskor ta’ 7-1. Għaldaqstant riedu li tal-anqas ma’ joħorġux mit-Tony Bezzina Stadium b’idejhom vojta. Il-punti importanti aktar għall-Maroons f’dan l-istadju fejn bin-nuqqas li jirbħu jinsabu fiż-żona l-ħamra u jridu jxammru l-kmiem jekk jittamaw li jevitaw aktar problemi lejn tmiem l-istaġun. B’erba’ timijiet jisfaw relegati ħadd m’għandu rasu mistrieħa.
INNUTAJNA
LI jidher li l-lista ta’ kontestanti għall-kariga ta’ Viċi President tal-MFA qed tkompli tikber. Fl-aħħar siegħat ħabbar il-kandidatura tiegħu l-Avukat Peter Fenech li flimkien mal-Avukat Matthew Paris, Adrian Casha u Pierre Miceli ser ikunu qed jikkontestaw għal żewġ postijiet. Dan għaliex il-post l-ieħor ser ikun qed jittieħed minn Dana Farrugia.
LI forsi tista tkun aħbar tajba għall-MFA wara li l-gowlkeeper żagħżugħ ta’ dixxendenza Maltija Joe Gauci ser ikun qed jilgħab fl-Ewropa ma’ Aston Villa, wieħed mill-klabbs ewlenin fl-Ingilterra. Aktar minn hekk ser ikun f’tim ta’ goalkeepers li ewlieni fosthom hemm Emiliano Martinez, Champion tad-Dinja renjanti mal-Arġentina.
