Allegat ħalliel ġie arrestat f’Tas-Sliema liebes żarbun misruq minn ħanut fil-Belt Valletta waqt inċident vjolenti fid-29 ta’ Jannar, semgħet il-Qorti it-Tlieta wara nofs inhar. L-Ispettur tal-prosekuzzjoni Daryl Borg spjega li par żarbun insteraq minn ħanut fi Triq il-Merkanti waqt inċident fejn saret ħsara fil-ħanut u weġġgħet assistenta tal-ħanut.
Waqt li kienet qed taħdem fuq filmati tas-CCTV mix-xena tad-delitt, il-pulizija pproduċiet ritratti li ttellgħu fis-sistema tal-pulizija. Uffiċjali tal-Pulizija f’għassa f’Tas-Sliema lemħu lir-raġel li allegatament tqabbel mas-suspettat u arrestawh.
Huwa kien liebes l-istess żarbun li ġie irrappurtat misruq, qal il-prosekutur. L-akkużat, Johan Armando Sanchez Arias, Kolumbjan ta’ 27 sena, ġie mixli b’serq aggravat, li weġġa’ ħafif lill-assistent tal-ħanut kif ukoll li kkawża ħsara volontarja fuq proprjetà ta’ terzi.
Inizjalment wieġeb ħati iżda wara li ngħata l-ħin biex jerġa’ jikkunsidra bidel fehmtu, minflok wieġeb mhux ħati. Ma saret l-ebda talba għall-ħelsien mill-arrest u l-Maġistrat Kevan Azzopardi żammeh arrestat. L-avukat tal-AĠ Manuel Grech u l-Ispettur Daryl Borg mexxew il-prosekuzzjoni. L-Avukat Alexia Vassallo kienet avukat tal-għajnuna legali.
