B’erba’ logħbiet f’żewġ stadiums differenti, illum jibdew jintlagħbu l-konfronti mir-round tal-aħħar 16 tal-IZIBET FA Trophy, it-tieni l-akbar unur fil-futbol Malti. L-eċitament f’din it-tazza issa jibda jinħass hekk kif issa minn tmien konfronti, ħamsa minnhom huma bejn timijiet tal-Kampjonat Premier, b’Żebbuġ u Swieqi miċ-Challenge League filwaqt li Mġarr United huwa l-uniku tim mill-kampjonat Amatuer League.
Forsi fuq il-karta l-aktar konfront interessanti huwa dak ta’ għada bejn Gżira United u Hibernians, li minkejja d-distakk fil-kampjonat, din il-logħba tista’ tkun waħda missielta u kif nafu f’din il-kompetizzjoni kollox jista’ jiġri.
Floriana, li bħal Sliema Wanderers rebħu dan l-unur 21 darba, m’għandux ikollhom problemi f’dan ir-round hekk kif illum se jkunu qed jilagħbu kontra t-tim li jinsab fin-naħa t’isfel tal-klassifika taċ-Challenge League Żebbuġ Rangers filwaqt li l-leaders tal-kampjonat Ħamrun Spartans il-Ħamis jilagħbu kontra Gudja United, li ironikament jerġgħu jilagħbu kontrihom il-Ħadd li ġej fil-kampjonat.
Konfront ieħor, li fil-ġurnata jista’ jkun interessanti huwa dak bejn Sliema Wanderers u Balzan, li għalkemm il-Blues jibdew xi ftit favoriti, anke minħabba l-forma li jinsabu fiha fil-kampjonat, Balzan xorta waħda huwa tim validu u anke din il-partita tista’ tmur kull naħa.
Logħba oħra bilanċjata għandha tkun dik tal-lum bejn żewġ timijiet diżappunt dan l-istaġun, Mosta u Valletta, b’dawn tal-aħħar li rebħu l-FA Trophy 14-il darba, dan l-aħħar urew xi ftit titjieb fil-logħob tagħhom u se jkunu qed jittamaw li jiġbru l-istaġun billi, minbarra li jassiguraw posthom mal-kbar, jipprovaw javvanzaw kemm jista’ jkun f’din it-tazza.
Il-logħob kollu mir-round tal-aħħar 16 tal-IZIBET FA Trophy huwa dan:
Illum:
Tony Bezzina Stadium
6pm – Birkirkara vs Sirens
8:30pm – Mosta vs Valletta
Centenary Stadium
6:15pm – Floriana vs Żebbuġ Rangers
8:45pm – Marsaxlokk vs Swieqi United
Għada:
Stadium Nazzjonali
6pm – Gżira United vs Hibernians
8:30pm – Sliema Wanderers vs Balzan
Centenary Stadium
8:15pm – Santa Lucia vs Mġarr United
Il-Ħamis:
Centenary Stadium
8:15pm – Ħamrun Spartans vs Gudja United
