Iż-żewġ plejers li qed jirrapreżentaw lil pajjiżna waqt il-Kampjonat Dinji tas-Snooker f’Golem, l-Albanija s’issa rebħu l-logħbiet kollha li lagħbu fihom waqt il-fażi tal-gruppi. Barra minn hekk Alex Borg diġa’ aċċerta ruħu mill-kwalifikazzjoni għall-fażi li jmiss.
Iċ-champion Malti tas-Snooker, Aaron Busuttil it-Tnejn lagħab kontra l-Belġjan Pechenart Olivier u rebaħ 3-1. Busuttil rebaħ l-ewwel frame iżda Olivier irrisponda mill-ewwel u ġab id-draw filwaqt li fiż-żewġ frames l-oħra l-Malti ħa l-kmand u kkontrolla faċilment. Fil-fatt fl-aħħar frame Busuttil għamel break ta’ 78 punt u għalaq il-logħba kmieni meta kien jonqos żewġ ħomor u l-kulur. Il-punteggi ta’ l-erba’ frames li ntlagħabu spiċċaw 54-32; 14-66; 69-53 u 78-1.
Ta’ min jinnota li Busuttil fiż-żewġ logħbiet li lagħab s’issa kellu ftit ta’ żvantaġġ li ma’ setax jilgħab bl-uniformi tiegħu peress li l-bagalja tiegħu ma wasiltx wara l-vjaġġ li kellhom nhar il-Ġimgħa għall-Albanija. Huwa kellu jissellef uniformi mingħand plejers oħra iżda tal-anqas wara l-logħba tiegħu tal-lum ġie infumat li l-bagalja waslet.
Illum huwa jilgħab l-aħħar logħba tiegħu tal-Grupp kontra l-Ingliż Chae Ross peress li l-partita l-oħra li kienet ipprogrammata għall-Erbgħa mhux ser tinlagħab wara li Muhammad Awais tal-Pakistan, li kien jinsab fi Grupp A ukoll, irtira.
Alex Borg, it-Tnejn, kompla għaddej bl-istess ritmu pożittiv tal-jumejn ta’ qabel u kontra l-Albaniż Fatosh Dervishaj huwa kellu rebħa ta’ 3-0 biex b’hekk s’issa għadu ma’ tilef l-ebda frame. Borg iddomina f’kull frame b’riżultati ta’ 71-21; 71-40 u 104-9 biex s’issa flimkien maż-żgħażugħ Tajlandiż Wiphu Phuthisabodi huma l-uniċi plejers li għadhom ma’ tiflu l-ebda’ frame wara tliet logħbiet.
L-Albaniż Dervishaj ilbieraħ ta walk-over lill-Ingliż Connor Benzey li għada ser ikun l-avversarju tal-veteran Malti f’logħba li tista’ tiddetermina min ser jirbaħ Grupp C. Benzey huwa wieħed min dawk il-plejers li minn żewġ logħbiet għadu ma’ tilef l-ebda frame.
