Raġel ta’ 30 sena, residenti Ħal Qormi li hu magħruf sew mal-Pulizija inżamm taħt arrest wara li tressaq quddiem il-Maġistrat Marse Ann Farrugia fuq diversi akkużi ta’ serq u li liema reati allegatament ikkommetta waqt li kien taħt diversi kundizzjonijiet tal-Qorti fuq reati oħra, u li sar riċediv.
Andreas Buħaġiar ġie mixli fi żmien ix-xahar ta’ Settembru tal-2023, ġewwa Triq il-Wileġ, San Pawl il-Baħar, ikkommetta serq ta’ vettura tal-għamla Toyota Vitz fl- ammont li jeċċedi l-€2,329.37. Ġie mixli wkoll li laqgħa għandu jew xtara ħwejjeġ misruqa, jiġifieri l-istess vettura.
Huwa ġie akkużat ukoll li matul il-lejl ta’ bejn it-13 u l 14 ta’ Ottubru li għadda minn ġewwa garaxx fi Triq il-Kus, Ħal Qormi, seraq diversi għodod u kompressuri, liema ammont jaċċedi is-somma €232.94ċ iżda ma jeċċedix l-€2,329.37ċ. Ġie mixli wkoll talli fl-istess data, ħin, lok u ċirkostanzi, volontarjament għamel ħsara fl-istess post li ma jiskorrix is-somma ta’ €2,500 iżda huwa iżjed minn €250.
Akkuża oħra fil-konfront tiegħu tgħid li matul l-istess lejl tas-serqa karozza minn garaxx, li jinsab fi Triq il-Burdnara, kantuniera ma’ Triq il-Kaċċatur ġewwa Ħal Qormi, liema karozza hi tal-għamla Toyota Townace, bl-ammont jeċċedi l-€2,329.37ċ. Ġie mixli li xjentament laqgħa għandu jew xtara ħwejjeġ misruqa u ċioe l-istess vettura.
Ġie mixli wkoll li fl-istess data, ħin, lok u ċirkostanzi, għamel ħsara jew għarraq ħwejjeġ ħaddieħor u li matul l-istess lejl wettaq serqa minn ġo ‘stationary food truck’, fi Triq L-Industrija, Ħal Qormi fejn ikkommetta serq ta’ cash register, flus kontanti u grossos tas-sigaretti u li għamel ħsara fil-propjetà tas-serqa.
Akkużi oħra jinkludi li fil-jum tal-14 ta’ Ottubru li għadda, kkommetta serq ta’ pjanċi tar-reġistrazzjoni minn fuq vettura tal-marka Cheverolet Captiva u li laqgħa għandu jew xtara ħwejjeġ misruqa, ċioe il-pjanċi tar-reġistrazzjoni.
Ġie mixli wkoll li matul il-lejl ta’ bejn it-2 u it-03 ta’ Frar, li għadda minn ġewwa stabbiliement fi Vjal il-Ħaddiem, ir-Rabat, Malta, kkommetta serq ta’ flus, liema serq huwa kkwalifikat bil-mezz, bil-ħin u bil-valur liema ammont jeċċedi is-somma ta’ €232.94ċ. iżda ma jeċċedix l-€2,329.37ċ. Ġie mixli wkolll li għamel ħsara fl-istess stabbiliment.
L-akkużi komplew jinqraw quddiem il-Qorti tal-Maġistrati fejn kien mixli li matul ix-xahar ta’ Frar li għadda jew qabel, naqas milli jħares xi waħda jew iżjed minn waħda mill-kundizzjonijiet tal-ħelsien mill-arrest imposti fuqu fid-digriet datat l-10 ta’ Marzu, 2020, mill-Qorti Kriminali.
Dn billi kkommetta reati ta’ natura volontarja. U aktar talli fl-istess dati, ħinijiet, lok u ċirkostanzi, naqas milli jħares xi waħda jew iżjed minn waħda mill-kundizzjonijiet tal-ħelsien mill-arrest imposti fuqu fid-digriet tas-16 ta’ Marzu li għadda mill-Qorti tal-Maġistrati.
U aktar talli fl-istess dati, ħinijiet, lok u ċirkostanzi, naqas milli jħares xi waħda jew iżjed minn waħda mill-kundizzjonijiet tal-ħelsien mill-arrest imposti fuqu fid-digriet datat 3 ta’ Jannar li għadda mill-Qorti tal-Maġistrat diversament preseduta.
U finalment aktar talli fl-istess data, ħin, lok u ċirkostanzi ikkommetta reat waqt li kien taħt ordni ta’ supervizzjoni temporanju mogħti mill-Qorti Kriminali u li l-Qorti ntalbegt li titratta ma’ Andreas Buhagiar bhala persuna reċidiv, b’sentenzi li huma defenittivi u ma jistgħux jiġu mħassra u dan ai termini tal- Artikoli 49, 50 u 289 tal-Kapitolu 9 tal-Liġijiet ta’ Malta.
Il-prosekuzzjoni tmexxiet mill-Avukat Giuliana Magro Conti mill-Uffiċċju tal-Avukat Ġenerali u l-Ispetturi Roderick Attard, Joseph Mallia, Francesca Maria Calleja u l-Ispettur John Sammut. Għall-akkużat dehret l-Avukat Yanika Bugeja li f’dan l-istadju ma għamlet l-ebda talba għall-pleġġ.
