Neil Camenzuli
MOSTA……………………………1
VALLETTA……………………....0
Mosta: D.Udoh, A.Chara, D.Aneni, C.Nwoga, L.Tenebe, A.Hovhannisyan, B.Dao, N.Agius, W.Britto J.Vassallo (S.Cachia 69’), Z.Brincat (J.Scerri 46’)
Valletta: J.Galea, J.Ramires,E.Ruiz, O.Barrientos,S.Dimech (J.Azzopardi 77’), G.Vieira, B.Paiber, M.Jezdimirovic, L.Prestes, V.Filho, C.Benites , D.Cardoso
Imwissija: B.Dao 54’, G.Chara 86′, P.Tenebe 87′ (M), E.Ruiz 70′ (V)
Skorjaw: Chidera Nwoga 91′ (M)
Referee: Slonodan Petrovic
Assistenti Referees: Luke Portelli u Vasil Vasilev
BOV Plejer tal-Logħba: David Akpan Udoh (M)
Il-Mument Plejer tal-logħba: Nathan Agius (M)
Fit-Tony Bezzina Stadium, Mosta kisbu rebħa kruċjali fil-ġlieda kontra r-relegazzjoni permezz ta’ gowl fil-91 minuta minn Chidera Nwoga, bIL-Mostin jiksbu tlett punti li jtellgħu lil Mosta f’pożizzjoni ħafna iktar komda fit-8 post b’total ta’ 20 punt wara 17-il logħba, filwaqt li Valletta jibqgħu fiż-żona tar-relegazzjoni b’18-il punt.
L-ewwel tentattiv perikoluż wasal minn Valletta wara 12-il minuta logħob permezz ta’ xutt b’saħħtu minn barra l-kaxxa li għadda barra jasal minn Brandon Paiber.
Mosta rrispondew 5 minuti wara b’din id-darba Hovhannisyan jittanta xortih mill-bogħod, b’ Galea jdawwar ix-xutt f’korner.
L-iktar azzjoni perikoluża tal-ewwel taqsima waslet wara 40 minuta logħob meta Benites ra lil goalkeeper Udoh barra mil-linja tiegħu u ttanta xortih minn kważi nofs il-grawnd, b’ Udoh jirnexxielu jmiss l-ballun u jitfa’ barra għall-korner.
L-ewwel taqsima tintemm fi draw ta’ bla gowls, biż-żewġ timijiet jipprovaw jikkontrollaw il-pussess tal-ballun u jfittxu l-ewwel gowl.
Mosta ħarġu fuq l-offensiva fit-tieni taqsima, b’ Hovhannisyan għal darb’oħra jkun ta’ periklu għad-difiża ta’ Valletta mix-xellug, bl-attakkant Armen jaqbeż id-difensur u jitfa’ fuq il-leminija u jipprova jdawwar xutt fir-rokna ta’ fuq, bil-ballun jgħaddi ftit barra.
Fit-48 minuta Valletta kisbu l-aħjar ċans tal-partita meta rebħu penalty permezz ta’ foul kommess minn Jake Vassallo fuq il-midfielder Brandon Paiber fil-kaxxa, b’ Diego Cardoso jinkariga ruħu mill-penalty, pero l-goalkeeper Udoh joħroġ rebbieħ b’save mill-isbaħ.
Mosta rrispondew għaxar minuti wara minn kross ta’ Britto jsib lis-sostitut Jamie Scerri li mill-viċin jixħet barra.
Fis-66 minuta Mosta għal darb’oħra jattakkaw il-lasti tal-Beltin, din id-darba minn żball tal-goalkeeper Galea li minn kross mix-xellug ma rnexxielux jaqbad il-ballun, b’Tenebe bir-ras f’lasta vojta jitfa’ barra.
Tmiem drammatiku għall-aħħar hekk kif Chidera Nwoga sab ix-xibka fil-91 minuta għall-gowl tar-rebħa mill-viċin bil-ballun jasal minn korner mogħti minn Damien Aneni, bil-gowl jibgħat il-partitarji preżenti f’dellirju ta’ ferħ u jitfa’ lill-Mostin f’pożizzjoni iktar komda għall-kumplament tal-istaġun.
