Rowen Camilleri
Bit-taqtigħa għar-rebħ tal-kampjonat issa jidher li se tkun bejn Ħamrun u Floriana, hekk kif Sliema issa jinsabu 7 punti taħt it-tieni post, din il-ġimgħa jispikkaw l-aktar il-konfronti bejn l-erba’ timijiet li jinsabu taħt xulxin, mit-tielet sas-sitt post fejn Birkirkara jiltaqgħu kontra t-tim bl-istess punti daqshom Hibernians filwaqt li Sliema Wanderers jilagħbu kontra Marsaxlokk. Partiti wkoll interessanti u diretti min-naħa t-isfel tal-klassifika partikolarment dik bejn Mosta u Valletta biż-żewġ timijiet iridu akkost ta’ kollox rebħa biex jieħdu ftit tan-nifs u jinqalgħu miż-żona tal-periklu.
Birkirkara vs Hibernians | Illum, fis-2pm fl-Istadium Nazzjonali
Il-partita tal-ġimgħa mis-17-il ġurnata tal-Kampjonat BOV Premier hija dik bejn Birkirkara u Hibernians, żewġ timijiet bi tragward simili, dak tal-Ewropa u li fil-mument jinsabu fir-raba’ post bl-istess ammont ta’ punti, 24. L-ewwel konfront dan l-istaġun bejn dawn it-tnejn kien wieħed missielet ferm u kien biss gowl ta’ Ciolacu fit-80 minuta li ta tliet punti lill-Istripes biex b’hekk għandna nistennew partita bilanċjata fejn ftit hi d-differenza fil-qawwa taż-żewġ skwadri. Birkirkara l-ġimgħa li għaddiet, fid-debutt fil-kampjonat ta’ Jose Borg fuq il-bankina, għelbu lil Valletta wara mument negattiv ta’ żewġ telfiet u draw fil-kampjonat filwaqt li Hibernians, wara l-eliminazzjoni mit-trophy sofrew ukoll telfa ta’ 2-0 kontra Floriana. Rebħa tista’ tfisser li xi ħadd minn dawn jitla’ fir-raba’ post kemm il-darba Marsaxlokk ma jegħlbux lil Sliema Wanderers f’konfront ieħor interessanti miż-żona Ewropa u li se jkun qed jintlagħab eżatt wara din il-partita, ukoll fl-Istadium Nazzjonali.
Marsaxlokk vs Sliema Wanderers | Illum, fl-4:15pm fl-Istadium Nazzjonali
Wara tliet riżultati ta’ draw konsekuttivi, Sliema ma jistgħux ikomplu jitilfu l-punti jekk iridu jżommu posthom mal-ewwel erbgħa hekk kif issa tista’ tgħid li nqatgħu mill-ġlieda għat-titlu, bid-dstakk minn ma’ Floriana kiber għal 7 punti. Madankollu din il-ġimgħa għandhom quddiemhom avversarju iebes, dak ta’ Marsaxlokk li bla dubju se jkun qed jagħmel minn kollox biex, l-ewwel nett ma jitlifx u għalhekk iżomm ir-raba’ post, iżda żgur li x-Xlukkajri huma konxji li b’rebħa jkunu biss żewġ punti taħt l-istess Sliema li issa l-pressjoni fuqhom qed tiżdied kull punt li jitilfu. Riżultat ta’ draw jkun l-aktar li jissodisfa lil Birkirkara u Hibernians li se jkunu qed jilagħbu kontra xulxin qabel dan il-konfront, bit-taqtiegħa għall-kwalifikazzjoni Ewropea jidher li se tkun waħda interessanti u li tista’ wkoll twassal sal-aħħar partiti tal-kampjonat. Fl-ewwel round anke dan il-konfront kien wieħed missielet, u simili għal dak bejn Birkirkara u Hibernians, il-gowl li ddeċida l-partita wasal minn Jacob Walker ta’ Marsaxlokk fit-83 minuta, biex il-punti massimi dakinhar ħadhom it-tim immexxi minn Winston Muscat.
Mosta vs Valletta | Illum, fis-2pm fit-Tony Bezzina Stadium
Punt biss hemm jifred lil Mosta u Valletta, b’dawn tal-aħħar jinsabu fid-disa’ post bi 18-il punt filwaqt li Mosta jinsabu fil-ħdax-il post bi 17-il punt u fiż-żona relegazzjoni. Minkejja li l-Mostin kisbu riżultat li jista’ jitqies bħala wieħed pożittiv bid-draw kontra Sliema Wanderers fl-aħħar ħarġa, f’dik li hi klassifika ma bidel xejn hekk kif huma xorta waħda baqgħu f’wieħed mill-erba’ postijiet tar-relegazzjoni u bħal Valletta, illum xejn inqas minn tliet punti ma jissodisfhom. Il-Beltin, wara mument pożittiv li kellhom, il-ġimgħa li għaddiet kienet waħda diffiċli ferm fejn wara li kienu eliminati mill-FA Trophy mill-istess Mosta, tliet ijiem wara sofrew telfa ta’ 1-0 kontra Birkirkara biex baqgħu fin-naħa t’isfel tal-klassifika. Bla dubju li dan il-konfront jista’ jibdel ħafna kemm f’dawk li huma punti kif ukoll fil-moral tat-timijiet rispettivi bit-tnejn li huma wara dan il-konfront għandhom erba’ logħbiet diffiċli ħafna u għalhekk mistennija jitilfu l-punti f’uħud minnhom. Fl-ewwel round Valletta u Mosta spiċċaw fi draw ta’ 1-1.
Santa Lucia vs Naxxar Lions | Illum, fl-4:15pm fit-Tony Bezzina Stadium
Konfront li jista’ jbiddel ħafna fil-klassifika huwa dak bejn Santa Lucia u Naxxar Lions, bis-Siants li se jkunu qed jipprovaw jinqalgħu miż-żona l-ħamra filwaqt li Naxxar iridu jerġgħu idawru l-paġna u jsibu l-forma li kellhom u jirritornaw għar-rebħ biex jevitaw li jidħlu fil-periklu huma wkoll. Santa Lucia fl-aħħar ħarġa kisbu rebħa importanti ta’ 1-0 kontra Balzan, liema rebħa ħalliethom fit-12-il post iżda tliet punti biss bogħod minn Gżira li jinsabu fl-10 post u għalhekk post ta’ salvazzjoni. Nistennew logħba missielta dejjem jekk it-tim immexxi minn Alessandro Zinnari jkollu l-prestazzjoni li kellu kontra Balzan bit-tliet punti kif għedna huma importanti ħafna għaż-żewġ timijiet li għalkemm jidhru ‘l bogħod minn xulxin fil-klassifika, kull m’hemm jifridhom huma 6 punti meta fadal għaxar logħbiet. L-ebda problema għal Naxxar fl-ewwel round li b’wirja mill-aqwa għelbu lil Santa Lucia 4-0.
Ħamrun Spartans vs Sirens | Għada, fil-11am fis-Centenary Stadium
Fl-ewwel partita tal-Ħadd, iċ-champions u leaders attwali Ħamrun Spartans m’għandux ikollhom problema meta fis-Centenary Stadium jiltaqgħu kontra wieħed mit-timijiet kważi destinati għaċ-Challenge League, Sirens. Seba’ rebħiet infila għal Ħamrun fil-kampjonat u jekk fl-ewwel parti tal-istaġun konna ngħidu li minkejja li kienu jġibu r-riżultat ma kienux daqsekk konvinċenti, s’issa mill-bidu tat-tieni round dejjem rebħu b’ċertu kumdità fejn fl-ewwel tliet logħbiet skorjaw 15-il gowl u sofrew biss 2. Sirens ġejjin minn żewġ riżultati ta’ draw u għalkemm wieħed minnhom huwa kontra Marsaxlokk, tim kwotat aktar minnhom, xorta waħda baqgħu ankrati fil-post ta’ qabel tal-aħħar b’6 punti, fejn aktar ma jmur aktar toqrob ir-relegazzjoni għal dan it-tim. Ħamrun se jkollhom nieqsin lil Bruno Ederson u lil Uros Djuranovic iżda bħalma rajna fl-aħħar partita fejn kellhom ukoll żewġ plejers importanti sospiżi, l-Ispartans fuq il-bank għandhom plejers tajbin daqs dawk fil-pitch u għalhekk ftit li xejn taffetwhom. Filfatt fl-aħħar partita, fl-assenza ta’ Jonny Robert, il-plejer mill-Ghana Seth Painstil kellu wirja mill-aqwa u probabbilment jerġa’ jibda mill-bidu kontra Sirens minflok Djuranovic. Fl-ewwel round Ħamrun għelbu lil Sirens 4-0.
Floriana vs Balzan | Għada, fis-2pm fit-Tony Bezzina Stadium
Floriana, l-eqreb rivali ta’ Ħamrun, fuq il-karta wkoll huma favoriti li jieħdu tliet punti, iżda l-avversarji, Balzan huma xi ftit aktar iebsin minn Sirens. Il-Greens diġa’ għelbu lil Balzan 3-0 fl-ewwel round u jekk fil-ġurnata jkunu fil-forma għandhom jegħlbu wkoll dan l-ostaklu kontra tim li jekk jibqa’ jitlef il-punti jista’ jsib ruħu ma ta’ taħt f’qasir żmien. Balzan jinsabu biss 2 punti fuq il-11-il post u dawn l-erba’ logħbiet kontra Floriana, Hibernians, Birkirkara u Naxxar jistgħu ikunu kruċjali għalihom fejn jistgħu huma wkoll ikunu qed jiġġieldu biex ma jaqgħux fl-aħħar logħbiet tal-kampjonat. F’Jannar dawn iż-żewġ timijiet kienu involuti fi tpartit sorpriża li ra lil Jan Busuttil jingħaqad ma’ Balzan filwaqt li Jake Grech mar ma’ Floiriana, b’dawn tal-aħħar s’issa jidher li marru l-aħjar minn dan il-ftehim.
Gżira United vs Gudja United | Għada, fl-4:15pm fit-Tony Bezzina Stadium
Is-17-il ġurnata tal-Kampjonat BOV Premier tiġi fi tmiemha bil-konfront bejn Gżira u Gudja fit-Tony Bezzina Stadium, konfront ieħor min-naħa t’isfel tal-klassifika. Gżira fl-aħħar partita kisbu rebħa importanti ta’ 1-0 kontra Naxxar u jeħtieġ li jerġgħu jiksbu l-punti massimi minn dawn iż-żewġ konfronti kontra l-aħħar żewġ timijiet fil-klassifika, Gudja u Sirens biex jinqalgħu mill-qiegħ. Gudja jibqgħu fl-aħħar post u l-uniku tim bla rebħa wara 16-il logħba fejn jistgħu jkunu qed jirrepetu wkoll dak li kienu għamlu Senglea Athletic fl-istaġun 2020/21 meta kienu ġew relegati mingħajr rebħa. Għalkemm mhumiex matematikament relegati, huwa kważi impossibli li t-tim immexxi minn Renzo-Kerr Cumbo jsalva postu meta d-distakk mill-għaxar post huwa ta’ 12-il punt. Fl-ewwel round Gżira umiljaw lil Gudja b’rebħa ta’ 6-1.
