Rowen Camilleri
BIRKIRKARA…………..1
HIBERNIANS……………1
Birkirkara: M. Zapytowski, E. Pepe, P. Mbong (A. Quiroz 64’), K. Zammit, A. Satariano (A. Zammit 73’), E. P. Beltre, N. Micallef ( O. Elouni 82’), A. Coppola, E. Sarpong (M. Maia 64’), S. Zibo, A. Diakite
Hibernians: I. Kone, K. Shaw, L. Caruana, J. Degabriele (I. Chukunyere 80’), A. Radchenko (A. Bruno 76’), G. Artiles, C. Bonanni, M. Bagayoko, G. Bastianos, R. Antwi (R. Bairam 69’), G. Fernandes
Imwissija: G. Fernandes 83’ (H), A. Queiroz 90+3’ (B)
Skorjaw: I. Chukunyere 85’ (H), A. Zammit pen 90+5’ (B)
Referee: Ishmael Barbara
Assistenti Referees: Duncan Spencer u James Brincat
BOV Plejer tal-Logħba: Neil Micallef (Birkirkara)
Il-Mument Plejer tal-logħba: Neil Micallef (Birkirkara)
Wara partita nieqsa għal kollox minn azzjonijiet lejn il-lasti, fl-aħħar ħinijiet il-konfront Birkirkara u Hibernians ħa xejra differenti u isbaħ hekk kif l-ewwel Hibernians dehru li kienu skorjaw il-gowl tar-rebħa fi-85 minuta, iżda kien penalty fil-ħames minuta tal-ħin miżjud fuq Andrea Zammit u mogħti minnu stess li salva punt għal Birkirkara.
Għal ħin twil il-partita kienet nieqsa minn azzjonijiet lejn il-lasti rispettivi, tant li l-ewwel xutt wasal fit-28 minuta meta minn azzjoni personali kien il-plejer ta’ Hibernians Rodney Antwi li ra x-xutt tiegħu minn barra l-kaxxa jmur barra.
Risposta minn Birkirkara għaxar minuti wara meta pass preċiż ta’ Santariano sab lil Paul Mbong żmarkat iżda Kone kien pront ħareġ minn postu u nterċetta x-xutt tal-Internazzjonali Malti.
Dawn kienu l-uniċi żewġ azzjonijiet li rajna fl-ewwel taqsima bl-iskor sal-mistrieħ jibqa’ ma jinfetaħx.
L-ewwel azzjoni perikoluża fit-tieni taqsima waslet fil-51minuta meta Mbong għadda lejn Satariano li prova xutt mill-ewwel fil-baxx iżda Kone laqa’ tajjeb.
Fid-59 minuta Birkirkara protestaw għal penalty meta Antwi deher iwaqqa’ lil Pena Beltre fil-kaxxa, iżda Ishmael Barbara ma ra xejn ħażin.
Fit-63 minuta xutt sabiħ minn barra l-kaxxa tal-plejer ta’ Hibernians Artem Radchenko li għadda ċentimetri barra.
Birkirkara fallew ċans tad-deheb wara żball fid-difiża ta’ Hibernians, bil-ballun jieħdu s-sostitut Maxuell Maia li avvanza iżda x-xutt fjakk tiegħu kien milqugħ bis-sieq minn Kone.
Hibernians marru fil-vantaġġ fil-85 minuta meta Bairam għadda lejn is-sostitut Isaiah Chukunyere li minn quddiem Zapytowski tefa’ l-ballun fir-rokna tax-xibka.
Meta kollox deher li Hibernians kienu se joħorġu mill-ground b’punti massimi, Birkirkara ingħataw penalty fil-ħames minuta tal-ħin miżjud meta Andrea Zammit twaqqa’ fil-kaxxa, bl-istess plejer jinkariga mill-penalty u jsalva punt għal Birkirkara fl-aħħar ħinijiet li jħalli l-ġlieda għall-Ewropa miftuħa.
