Il-Pulizija għaddejja bi tfittxija għall-allegat ħalliel wara li kien hemm rapport ta’ serqa minn ħanut f’Santa Venera.
Is-serqa seħħet is-Sibt filgħaxija għall-ħabta tas-7:00 fi Triq il-Kanun.
Il-Pulizija marret fil-post u minn investigazzjoni li saret jidher li persuna, allegatament armata
b’sikkina, daħlet fil-ħanut u talbet il-flus lill-kaxxier. Il-persuna ħarbet mill-post wara li serqet ammont ta’ flus kontanti.
Fortunatament, ħadd ma weġġa’.
Bil-każ ġiet infurmata il-Maġistrat tal-Għassa Caroline Farruġia Frendo li fetħet inkjesta filwaqt li l-investigazzjonijiet tal-Pulizija għadhom għaddejjin.
