Birżebbuġa Lions fetħu beraħ il-Kampjonat tal-Ewwel Diviżjoni tal-Malta Darts Association wara li għelbu lil-leaders Żejtun Laċċi Gold Lady 5-3 barra minn darhom.
Birżebbuġa ħasdu lill-avversarji meta fetħu vantaġġ ta’ erba’ games b’Żejtun li minkejja kollox naqqsu l-marġni tal-iskor għal 4-3. L-aħħar game kienet waħda interessanti għalkemm fl-aħħar kienu Birżebbugia li għalqu l-konfront 5 – 3 u ħadu t-tliet punti importanti.
B’dan ir-riżultat approfittaw Tim A Tim Ħamrun Bayern u Floriana Ajax Premier Cars li kellhom rebħiet faċli kontra Floriana Ajax MCP bl-iskor ta’ 8-0 u Tim A Sliema Lounge 7-1 sabiex telgħu jaqsmu l-ewwel post tal-klassifika.
Tim B Ħamrun Bayern rebħu l-isfida tan-naħa t’isfel tal-klassifika kontra PO’s Bar 6-2 .
Mill-Kampjonat tat-tieni diviżjoni, Duke’s Bar għelbu lil Domus Men’s bl-iskor ta’ 6-2 filwaqt li Tim A Birgu Boċċi Club baqgħu bis-serje pożittiva fir-rebħa ta’ 8-0 kontra Tim A Leah’s Bar .
Mill-Kampjonat tat-tielet diviżjoni, Tim B Leah’s Bar komplew wkoll bis-serje pożittiva tagħhom fejn baqgħu fl-ewwel post wara r-rebħa ta’ 8-0 kontra Tim B Sliema Lounge .
