Imħallef irrifjutat it-talba ta’ Joseph Muscat biex tiġi inkluża talba ġdida fil-każ tad-drittijiet tal-bniedem li ppreżenta b’rabta mal-inkjesta maġisterjali Vitals-Steward. L-Imħallef Doreen Clarke ddeċidiet it-Tnejn li t-tentattiv tal-eks Prim Ministru li jintroduċi talba ġdida kien ekwivalenti għal “bidu ta’ każ ġdid”.
L-Imħallef irrifjutat t-talba ta’ Joseph Muscat biex jintroduċi talba ġdida f’każ li għadu għaddej dwar id-drittijiet tal-bniedem li ressaq b’rabta mal-inkjesta tal-isptarijiet. Filwaqt li kkwotat l-każistika, l-imħallef qalet li l-liġi tippermetti li jsiru bidliet fit-talbiet oriġinali u d-dokumenti tal-qorti, madankollu, dan huwa maħsub biex jemenda l-iżbalji u mhux biex jinbidel il-mertu tal-każ.
Qalet ukoll li t-talba l-ġdida li ried jintroduċi Joseph Muscat ma kinitx sempliċi bidla iżda waħda li ‘jċaqqlaq il-lasti’ tal-kors oriġinali tal-azzjoni. “Fil-verità, dak li qed jipprova jagħmel Muscat mhux li jikkoreġi żball imma li jibda kawża ġdida, b’konsegwenzi u talbiet kompletament differenti, fi ħdan każ li diġà beda,” qalet l-imħallef.
Filwaqt li ċaħdet it-talba ta’ Muscat u ordnatlu jħallas l-ispejjeż. Il-każ, li se jkompli, kien ippreżentat minn Joseph Muscat is-sena l-oħra kontra l-Avukat tal-Istat. Huwa qed isostni ksur tad-drittijiet umani tiegħu b’riżultat tal-inkjesta maġisterjali li għaddejja dwar il-ftehim ta’ privatizzazzjoni tal-isptarijiet.
L-inkjesta nbdiet fl-2019 fuq inizjattiva tar-Repubblika. L-inkjesta oriġinarjament kienet immirata kontra l-eks ministri Chris Cardona, Konrad Mizzi u Edward Scicluna iżda wara twessgħet biex tinkludi lil Muscat. Muscat kien ipprova jneħħi lill-maġistrat mill-inkjesta, u saħaq li kellha kunflitt minħabba li l-qraba tagħha kienu pubblikament kritiċi tiegħu.
Huwa lmenta wkoll minn leaks kostanti mill-inkjesta u d-deċiżjoni tar-rifjut tal-maġistrat li tħallih jixhed quddiemha. F’Jannar 2022, bħala parti mill-inkjesta, uffiċjali tal-pulizija fittxew id-dar ta’ Muscat f’Burmarrad fejn ġew elevati diversi apparati elettroniċi.
Sadanittant, ftit wara d-deċiżjoni tal-Imħallef, Muscat ikkummenta fuq Facebook, fejn sostna li d-deċiżjoni tal-qorti “jdgħajjef” id-drittijiet fundamentali. Il-każ ikompli fil-25 ta’ Marzu li ġej, f’nofs inhar.
