Il-film ‘Oppenheimer’ rebaħ xejn inqas minn seba’ unuri fil-BAFTA Awards ta’ din is-sena hekk kif iddomina is-serata – b’unur fost l-oħrajn għall-Aqwa Attur, Cillian Murphy.
Il-film ‘Poor Things’ rebaħ 5 awards, waqt li l-film Barbie ma rebaħ xejn.
Robert Downey Jr rebaħ l-unur ta’ attur fi rwol sekondarju għall-parti li interpreta fil-film ‘Oppenheimer’ waqt li Christopher Nolan ingħata l-unur tal-aqwa direttur għal dan l-istess film – li tefa’ dawl fuq il-ħajja tax-xjentists Robert Oppenheimer li ħoloq il-bomba atomika.
Il-film ‘Oppenheimer’ rebaħ ukoll l-iktar unur prstiġjuż tas-serata, dak tal-aqwa film – award preżentat minn Micheal J Fox li b’sorpriża preżenta dan l-unur minkejja li ilu aktar minn 30 sena jbagħti bil-kundizzjoni tal-Parkinson’s.
Il-film ‘Poor Things’ fost il-ħames unuri li rebaħ ra lil Emma Stone tirċievi l-award tal-aqwa attriċi.
Waqt li l-film ‘The Zone of Interest’ rebah 3 unuri u ‘The Holdovers’ rebaħ żewġ unuri fosthom l-unur tal-aqwa attriċi f’parti sekondarja, li ngħata lil Da’ Vine Joy Randolph.
Intant, din kienet it-tieni sena konsekuttv li ma ingħatax unur lil persuna Brittanika fil-kategorija tar-reċtar minkejja li dawn huma l-unuri Brittaniċi tal-Film u l-Arti Televiżiva.
Minn naħa l-oħra l-aqwa unur għal film Britaniku ingħata lil produzzjoni ‘The Zone of Interest’ li jitratta l-istorja ta’ kmandant tal-gwerra li kien jgħix viċin Auscwitz fit-Tieni Gwerra Dinjija.
Din is-serata bla dubju ta’ xejn kienet ta’ dizappunt għal dawk kollha involuti fil-produzzjoni tal-film Barbie hekk kif minkjejja li ‘Barbie’ kien l-iktar film ta’ suċċess fil-box office u minkejja li kellu ħames nominazzjonijiet il-film ma rebaħ l-ebda unuri.
‘Killers of the Flower Moon’, ‘Maestro’, ‘All of Us Stranger’ u ‘Saltburn’ ukoll kienu fost il-films li kellhom numru ta’ nominazzjonijiet u li ma rebħu xejn.
Preżenti għal din is-serata kien hemm ukoll il-Prinċep William li għamel l-ewwel dehra pubblika tiegħu minn mindu l-mara tiegħu Kate ġiet operata.
