It-Tlieta waranofsinhar waslet Malta Selah; tifla ta’ 3 snin li sa ftit tal-jiem ilu kienet f’Gaza. F’età daqstant bikrija Selah diġà rat ħafna quddiem għajnejha hekk kif kaġun tal-gwerra fil-Medda ta’ Gaza hija tilfet lil ommha u lil ħuha.
Folla numeruża nġabret fl-Ajruport Internazzjonali ta’ Malta sabiex jilqgħu lil Selah f’pajjiżna fejn spikka l-mument li hi dehret f’idejn l-Ambaxxatur tal-Palestina. Spikkat ukoll ir-reazzjoni tat-tifla hekk kif ingħatat diversi rigali.
Aktar kmieni, l-Ambaxxata f’pajjiżna bagħtet container b’donazzjonijiet b’ikel u diversi affarijiet essenzjali lejn Gaza. Bl-Ambaxxatur jesprimi ringrazzjament kbir lil dawk kollha li għamlu donazzjoni, li żgur se tfisser ħafna għall-Palestinjani. Dan filwaqt li jittama li xi darba l-Palestinjani jkunu verament ħielsa.
