Il-midfielder ta’ Real Madrid Toni Kroos se jirritorna mat-team nazzjonali tal-Ġermanja wara talba li saritlu mill-kowċ tat-team nazzjonali Julian Nagelsmann.
It-talba mill-kowċ Nagelsmann saret ftit xhur qabel il-ftuħ tal-fażi finali tal-Euro 2024 li se jsir propju fil-Ġermanja f’Ġunju li ġej.
Kroos, li għandu 34 sena, se jkun qed jirritona mal-Ġermanja wara nuqqas ta’ tliet snin fejn l-aħħar li lagħab kien fil-EURO ta’ tliet snin ilu.
Kroos ħabbar dan fuq Instagram fejn qal li kien se jirritorna wara li kien mitlub minn Nagelsmann. Hu qal li jinsab ħerqan u jħares b’entużjżmu lejn dan ir-ritorn. Kroos qal li kontra dak li ħafna jaħsbu l-Ġermanja se tkun fost il-protagonisti fil-EURO li jmiss f’Ġunju li ġej.
Kroos mistenni li jkun imsejjaħ għal-logħba ta’ ħbiberija li l-Ġermanja jmissha kontra Franza fit-23 ta’ Marzu u kontra l-Olanda tlett ijiem wara.
Il-Ġermanja li se torganizza il-Kampjonat Ewropew tinsab fil-grupp mal-Ungerija, l-Iżvizzera, u l-Iskozja. L-EURO 2024 ta’ din is-sena se jibda fl-14 ta’ Ġunju.
