Bħala parti mill-wirja Pelé: Forever O Rei, li se tkun qed tittela’ min Kenneth Formosa u Dr. Persio Luis Nicoletti bejn it-2 ta’ Marzu u l-24 t’April, il-leġġenda Brażiljan Jose Altafini se jkun f’pajjiżna sabiex jinawgura din il-wirja kif ukoll jitkellem mad-dilettanti tal-futbol Maltin.
Altafini huwa wieħed mill-aqwa plejers tal-futbol fis-snin 60 u 70 u rebaħ mhux biss it-Tazza tad-Dinja tal-1958 flimkien ma’ Pelé, Vava, Garnica u Djalma Santos fost oħrajn, iżda kellu suċċessi oħra fil-futbol Ewropew partikolarment ma’ Milan fejn biż-żewġ gowls tiegħu, it-tim dak iż-żmien immexxi minn Nereo Rocco rebaħ it-Tazza Ewropea kontra Benfica.
Barra minn hekk Altafini fl-Italja lagħab ukoll ma’ Napoli u Juventus fejn rebaħ 4 darbiet il-kampjonat. Wara l-karriera tal-futbol milgħub, ħafna jiftakkru lil Altafini bħala ko-kummentatur tal-logħob tas-Serie A fis-snin 80 u 90.
L-esebizzjoni se tiftaħ fit-2 ta’ Marzu fil-Postal Museum fil-Belt Valletta fejn waqt l-inawgurazzjoni tagħha Altafini mistenni jaqsam uħud mill-esperjenzi u stejjer li kellu ma’ Pelé, li lagħab miegħu mat-tim nazzjonali Brażiljan u baqgħu ħbieb anke wara l-karriera tagħhom.
L-esebizzjoni se tkun qed tfakkar il-karriera u l-ħajja ta’ Pelé permezz ta’ artikli li se jkunu qed jiġu esebiti għall-ewwel darba.
Il-pubbliku għandu l-oppportunità li jiltaqa’ ma’ Jose’ Altafini fis-Suq tal-Belt fit-2 ta’ Marzu 2024 mill-10am ‘il quddiem fejn minbarra li se jkun qed jirrakonta stejjer dwaru u dwar sieħbu Pele, dawk preżenti se jkunu wkoll jistgħu jieħdu ritratti miegħu kif ukoll firem fuq memorabilja.
Jose’ Altafini se jkun qed jinġieb Malta b’kollaborazzjoni ma’ Sports Legends Malta, b’dawk interessati jistgħu jsibu aktar informazzjoni fuq il-paġna ta’ Facebook ta’ Sports Legend Malta jew jibgħat email fuq
footballlegendsmalta@gmail.com
