Chelsea, Wolves, Liverpool u Manchester United għaddew għall-kwartifinali tal-FA Cup meta rebħu l-logħbiet tagħhom ilbieraħ mill-ħames round.
Telgħu ukoll il-poloz fejn fil-kwartifinali jispikka l-konfront f’Old Trafford bejn Manchester United u Liverpool.
Manchester United kellhom bżonn daqqa ta’ ras ta’ Casemiro fl-aħħar sekondi tal-logħba biex huma eliminaw lil Nottingham Forest 1-0 fis-City Ground.
Wolves ukoll avvanzaw b’rebħa minima fuq Brighton. Il-goal determinanti għal Wolves kien skorjat minn Lemina wara biss żewġ minuti logħob.
Liverpool friski mis-suċċess kontra Chelsea fil-League Cup għelbu lil Southampton 3-0 b’goals ta’ Koumas u doppjetta ta’ Danns.
Chelsea kellhom jitħabtu biex għelbu lil Leeds United fi Stamford Bridge fejn il-Blues kisbu l-kwalifikazzjoni b’goal fil-91 minuta.
Leeds fetħu l-iskor fit-8 minuta permezz ta’ Joseph li sfrutta inċertezza fid-difiża ta’ Chelsea.
Ir-reazzjoni ta’ Chelsea kienet immedjata u dawwru r-riżultat b’goals ta’ Jackson u Mudryk.
Fit-tieni taqsima Leeds kisbu l-goal tad-draw meta Joseph skorja t-tieni goal personali tiegħu b’daqqa ta’ ras mill-viċin.
Meta l-logħba dehret li se tmur għall-ħin barrani wasal il-goal tar-rebħa ta’ Chelsea li kien skorjat minn Gallacher fuq pass ta’ Enzo Fernandez.
Intant il-bieraħ telgħu wkoll il-poloz tal-kwartifinali tal FA Cup, kwartifinali li jridu jintlagħbu fis-16 u 17 ta’ Marzu li ġej.
Riżultati
Chelsea v Leeds 3-2
Nottingham v Man U 0-1
Wolves v Brighton 1-0
Liverpool v Southampton 3-0
Poloz kwartifinali
Wolves v Coventry
Man Utd v Liverpool
Chelsea v Leicester
Man City v Newcastle
