Ilbieraħ fl-Italja ntlagħbu l-aħħar żewġ logħbiet minn erbgħa li ma kienu intlagħbu minħabba s-Super Cup Taljana.
Inter ikkonfermaw il-mument maġiku tagħhom meta b’wirja mill-aqwa ġabu fix-xejn lil Atalanta u rebħu 4-0 biex issa l-vantaġġ tagħhom fuq Juventus tela’ għal tnax-il punt.
Għal Atalanta din kienet it-tieni logħba f’San Siro fi tlett ijiem wara d-draw xi ftit kontroversjali kontra Milan nhar il-Ħadd.
Atalanta kellhom goal ta’ De Keteleare imħassar fil-bidu tal-logħba u Inter fetħu l-iskor fis-26 minuta permezz ta’ Darmian.
Fil-ħin miżjud tal-ewwel taqsima Lautaro Martinez skorja t-tieni goal wara pass ta’ Pavard.
Fit-tieni taqsima kompla d-dominju ta’ Inter u fl-54 minuta Martinez kellu penalty li ħabat mal-lasta u mir-rebound kien Dimarco li spara fix-xibka.
Fit-72 minuta Inter skorjaw ir-raba’ u l-aħħar goal permezz ta’ Frattesi.
Fil-logħba l-oħra rebħa kbira għaċ-champions Napoli li għelbu lil Sassuolo 6-1 barra minn darhom.
Riżultat ieħor negattiv għal Sassuolo li issa jpoġġihom it-tielet mill-aħħar u potenzjalment relegati għas-Serie B.
Għal Napoli protagonista assolut kien l-attakkant Osimhen li skorja hat trick.
Bidu tajjeb għal Sassuolo li fetħu l-iskor fis-17-il minuta permezz ta’ Racic.
Iżda Napoli wettqu reazzjoni u Rrahmani kiseb id-draw fid-29 minuta u sal-intervall l-iskor sar 3-1 grazzi għal żewġ goals ta’ Osimhen.
Żewġ minuti mill-ftuħ tat-tieni taqsima Osimhen għaqqad il-hat trick biex l-iskor sar 4-1 u wara kien Kvaratskhelia li skorja doppjetta għal skor finali ta’ 6-1
Riżultati
Sassuolo v Napoli 1-6
Inter v Atalanta 4-0
