Flus mill-iskema tal-UEFA Solidarity Payments, is-Sibt filgħodu tqassmu uffiċjalment mill-President tal-Malta Football Association, Bjorn Vassallo lil diversi nurseries tal-futbol f’pajjiżna F’attivitá organizzata fit-training grawnds f’Ta’Qali, ‘il fuq minn 320 tifel u tifla li jirrapreżentaw il-biċċa ‘l kbira tan-nurseries tal-futbol li għadna f’Malta, kienu preżenti għal din l-okkazzjoni u ħatfu l-opportunitá sabiex jilgħabu l-logħba favorita tagħhom, il-futbol fuq il-ħaxix naturali f’Ta’Qali.
Għal din l-okkazzjoni, l-MFA, flimkien mal-Fondazzjoni Inħobb il-Futbol u l-Youth Football Association, ingħaqdu flimkien biex jorganizzaw il-festival annwali ta ’taħt is-7 snin.
Total ta’ 33 nursery ħadu sehem fl-avveniment ta’ din is-sena u li għal darb’oħra kompla jagħti konferma tal-ħidma imprezzabbli li jipprovdu dawn in-nurseries mifruxa f’pajjiżna, fir-rwol fundamentali tagħhom fl-ekosistema tal-futbol.
Bħal fl-aħħar snin, il-ħlasijiet annwali tas-solidarjetá tal-UEFA tqassmu lin-nurseries waqt din l-attivita’ popolari.
Preżenti, flimkien mal-President tal-MFA, Bjorn Vassallo, kien hemm Fr Hilary Tagliaferro, President Onorarju u fundatur tal-Youth FA, hekk kif dawn it-tnejn flimkien ma’ diversi persuni oħra distinti mil-familja tal-futbol lokali, setgħu japprezzaw atmosfera unika fejn il-futbol għal darb’oħra l-futbol serva ta’ ċelebrazjzoni kbira fost it-tfal.
F’kelmtejn tal-okkazzjoni, l-President Vassallo qal li dawn l-avvenimenti jenfasizzaw l-importanza li ninvestu fil-perkors tat-tfal u ż-żgħażagħ tagħna, u li huwa essenzjali biex uliedna jiżviluppaw karattru b ’mod parallel mill-aspett edukativ kif ukoll dak kalċistiku.
Vassallo żied jgħid li l-MFA, flimkien mal-Fondazzjoni Inhobb il-Futbol u l-Youth FA, jibqgħu impenjati bis-sħiħ sabiex jinvestu fil-programmi tal-infrastruttura u l-iżvilupp tat-talent, u dan sabiex jissaħħaħ is-settur tal-grassroots fil-futbol lokali.
