It-taqtigħa għall-ewwel post fil-Premier League tkompli din il-ġimgħa, bl-iktar partita tispikka tkun bejn Liverpool u Manchester City, biż-żewġ timijiet jokkupaw l-ewwel żewġ postijiet fil-klassifika. Liverpool huwa t-tim fl-ewwel post, b’63 punt wara 27 logħba, filwaqt li Manchester City huma fit-tieni post b’62 punt.
Il-partita se tintlagħab għada fl-4:45pm, filwaqt li Arsenal li jinsabu fit-tielet post b’61 punt ikunu mpenjati illum kontra Brentford fis-6:30pm, b’riżultat favorevoli għall-Gunners miż-żewġ partiti jista jfisser li jitilgħu fl-ewwel post.
Intant, numru ta’ partiti skedati għas-Sibt, bl-ewwel partita tintlagħab fis-1:30pm bejn Manchester United u Everton f’ Old Trafford.
Tlett partiti illum fl-4:00pm, b’ Crystal Palace jaffrontaw lil Luton Town, filwaqt li Wolves jospitaw lil Fulham fil-Molineux Stadium. Il-partita l-oħra tkun bejn Bournemouth u Sheffield United.
Għada, fis-2:00pm, partita kruċjali għall-ġlieda għall-post mal-ewwel erbgħa, b’ Aston Villa jaffrontaw lil Tottenham Hotspur f’ Villa Park. Il-Villians jinsabu fir-raba’ post b’total ta’ 55 punt, b’ Tottenham jokkupaw il-ħames post b’total ta’ 50 punt. Aston Villa għaddejin minn forma impekkabli, fejn rebħu l-aħħar tlett partiti konsekuttivi fil-Premier League.
Il-partiti l-oħra skedati għat-3:00pm, fejn Brighton qed jittamaw li jirritornaw għar-rebħ kontra Nottingham Forest, hekk kif is-Seagulls tilfu l-aħħar 4 logħbiet fil-kompetizzjonijiet kollha. Fil-partita l-oħra, West Ham se jkunu qed jaffrontaw it-tim li jinsab fil-qiegħ tal-klassifika, Burnley, bil-Hammers ifittxu li jiksbu r-raba’ rebħa konsekuttiva.
Finalment, l-aħħar partita skedata tintlagħab it-Tnejn fid-9:00pm, bejn Chelsea u Newcastle United fi Stamford Bridge.
Illum:
Manchester United v Everton 1:30pm
Bournemouth v Sheffield United 4:00pm
Crystal Palace v Luton Town 4:00pm
Wolves v Fulham 4:00pm
Arsenal v Brentford 6:30pm
Għada
Aston Villa v Tottenham Hotspur 2:00pm
Brighton v Nottingham Forest 3:00pm
West Ham United v Burnley 3:00pm
Liverpool v Manchester City 4:45pm
It-Tnejn
Chelsea v Newcastle United 9:00pm.
