Rosanne Barbara Zarb ma setgħetx tiftakar tuża fondi tal-mejjet żewġha, il-kont tal-klijent tan-nutar Ivan Barbara, biex tħallas għall-karozza l-ġdida tagħha, meta ffaċċjata minn domandi li sarulha hekk kif kienet fuq il-pedana tax-xhieda, b’ċekk indirizzat lill-konċessjonarju.
F’Jannar tal-2022, numru ta’ persuni kienu fetħu kawża ċivili konġunta kontra Barbara Zarb, fejn talbu li hi tagħti lura xi €165,000 li żewġha kien ilu jżomm f’depożitu. Huma qalu li Barbara Zarb għall-bidu kienet qaltilhom biex jistennew u li r-rifużjonijiet tagħhom se jittardjaw għal raġunijiet burokratiċi, peress li n-nutar kien miet barra minn Malta, iżda aktar tard kienet skoprew li Barbara Zarb kienet irrinunzjat għall-wirt tagħha.
L-armla tan-nutar qed tikkontesta t-talba biex tħallas lura l-flus, permezz tal-avukat tagħha Phyllis Aquilina. Barbara Zarb kienet kontro-eżaminata mill-avukat David Bonello meta l-każ kompla quddiem l-Imħallef Audrey Demicoli – l-Ħamis.
L-armla tan-nutar Ivan Barbara, li miet bil-Covid-19 fl-Indja f’April tas-sena l-oħra meta l-koppja telgħet biex tadotta tifel, se titressaq il-Qorti u tiġi mixlija li ħadet ġurament falz.
L-akkuża li għandha quddiemha Rosanne Barbara Zarb hija relatata ma’ dikjarazzjoni li għamlet taħt ġurament waqt każ li allegatament jinvolvi allegata miżapproprjazzjoni ta’ fondi li jappartjenu lill-klijenti ta’ żewġha.
Il-Pulizija ressqet l-akkużi kontra Barbara Zarb, ta’ 49 sena minn Raħal Ġdid, wara li minn investigazzjoni li saret instab li allegatament gidbet fit-tweġiba tagħha lill-Maġistrat. L-Avukat Bonello staqsiha dwar ir-relazzjoni finanzjarja tagħha man-negozjant tal-karozzi Michael Debono Ltd. Hi kienet se tħallas għal karozza li kienet xtrat hi stess permezz ta’ ‘standing order’, hija wieġbet.
L-avukat Bonello wera lix-xhud kopja ta’ ċekk, maħruġ mill-kont tal-klijent, indirizzat lil Michael Debono Limited u staqsa jekk kienx intuża biex tħallas il-karozza tagħha. Qalet li ma kinitx għamlet dan, iżda mbagħad qalet “Ma niftakarx.”.
L-avukat ikkonfronta lill-mara b’ċekk ieħor mill-kont tal-klijent, li kien indirizzat lilha. Dr. Bonello talabha tispjega dan, fid-dawl tal-pretensjonijiet preċedenti tagħha li ma kinitx involuta fix-xogħol jew fil-finanzi ta’ żewġha. “Ir-raġel tiegħi kien ikollu bżonn il-flus. Ġieli kont inselliflu l-flus, ġieli nħallaslu l-VAT. Kont infakkru ta’ spiss imma kien jipposponi ħafna.”
Barbara Zarb qalet lill-Qorti li żewġha kien “kemmxejn diżorganizzat” u li ġieli kienet tisliflu l-flus meta jispiċċa jaqa’ lura. Dan kien l-aktar biex iħallas il-VAT u taxxi oħra, hija qalet. “Ma ħadtx il-flus biex ngħin lili nnifsi imma biex ngħinu. Jien kont inselliflu l-flus għal xi raġuni jew oħra. Kont inżomm lista u kien iħallasni lura, ġieli fi flus, ġieli b’ċekk, ma kontx tajt kas minn liema kont bankarju kienu joħorġu.”
“L-aħħar ħlas li għamilt lil żewġi kien fid-29 ta’ April, u hu miet fit-30. Kien is-salarju ta’ nutar junior.” Dr. Bonello staqsa jekk sabitix stramb li ċ-ċekk inħareġ mill-kont tal-klijent. “Le,” hi wieġbet, u spjegat li żewġha kien se jħallas għall-karozza tagħha u jnaqqasha mill-ammonti li kien dovut lilha.
Hi ċaħdet li qatt użat faċilità ta’ overdraft bankarju jew li saħansitra rat iċ-ċekkijiet qabel. L-Avukat Bonello qalilha: “id-dikjarazzjoni tiegħek tgħid li kont ħallast għal kollox fl-Indja, permezz tal-Gold Card tiegħek. Taf jekk tħallsux xi flus mill-overdraft tal-kont tal-klijent fil-kont tiegħek tal-BOV Gold Card?
“Ma nafx u ma kellix kontroll fuqha,” hija wieġbet. L-avukat staqsiha kif se kienet tħallas il-kontijiet tal-VAT ta’ żewġha. “Dan ġara aktar minn darba. Ġieli ħallast fi flus kontanti fil-MaltaPost, f’okkażjoni minnhom ħallast mill-kont personali tiegħi,” weġbet Barbara Zarb, li saħqet li kienet tiddependi biss fuq iċ-ċifri li kien jagħtiha żewġha meta timla d-dikjarazzjoni tal-VAT tiegħu.
“Lanqas ngħodd l-irċevuti. Kien jgħidli €12,000 u jien kont nikteb €12,000. Jien ma kontx l-accountant tiegħu.” Dr. Bonello staqsa min kien l-accountant tiegħu. “Ma kellux,” dlonk wieġbet. “Int accountant bi professjoni?” staqsa l-avukat. Barbara Zarb ikkonfermat li kienet. “Dan ma jikkostitwixxix involviment fl-affarijiet tiegħu?” staqsa Dr. Bonello. “Jien kont qed ngħinu,” wieġbet. Is-seduta ġiet aġġornata għal Mejju biex ir-rappreżentanti tal-BOV jixhdu dwar il-kont Gold.
