Żagħżugħ ġie mixli li weġġa’ serjament turist li mbottah waqt argument li nqala’ wara ħabta bejn żewġ karozzi fil-bidu tal-vaganza tiegħu f’Malta. It-turist kien ilu Malta biss ftit aktar minn siegħa meta allegatament qala’ daqqa ta’ ponn f’għajnejh ix-xellugija minn Owen Cremona ta’ 25 sena, minn Ħal Tarxien, f’ħabta li seħħet f’Ħal Luqa.
L-Ispettur Paul Camilleri qal lill-Maġistrat Kevan Azzopardi li t-turist Daniż kien qed isuq tul Triq il-Kunsill tal-Ewropa, fl-10 ta’ Marzu meta kien involut f’ħabta ma’ karozza misjuqa minn missier l-imputat. It-tnejn ħarġu mill-karozzi tagħhom u rriżulta li t-turist imbotta lis-sewwieq l-ieħor.
Dak kien meta t-tfajla ta’ Cremona ċemplet lill-għarus tagħha biex tgħidlu x’ġara, bl-akkużat jasal fuq il-post malajr. Mal-wasla tiegħu, it-turist ipprova jimbotta lil Cremona li allegatament irritalja billi tah daqqa ta’ ponn f’għajnejh, u kkaġunalu ġrieħi gravi, semgħet il-Qorti.
Cremona qed iwieġeb mhux ħati. Waqt is-sottomissjonijiet, l-avukat difensur Franco Debono innota kif il-Pulizija għażlet li tressaq il-qorti lil suspettat bl-użu ta’ ċitazzjoni b’urġenza li rari tintuża minflok taħt arrest f’każ fejn żewġ xhieda barranin kellhom iħallu l-gżira fi ftit jiem.
F’każijiet bħal dawn, il-pulizija normalment tressaq il-Qorti lis-suspettat taħt arrest biex tkun tista’ tisma’ b’urġenza lix-xhieda, ħafna drabi barranin, li jkunu jridu jitilqu mill-pajjiż. L-Avukat Debono qal li din kienet il-proċedura t-tajba li għandha tiġi adottata meta l-unika raġuni biex jitressaq il-Qorti taħt arrest kienet għaliex ix-xhieda dalwaqt kienu se jħallu l-gżira.
Qal li huwa inġust li persuna taħt arrest titressaq f’ċirkustanzi bħal dawn meta l-liġi tipprovdi proċedura alternattiva – dik ta’ ċitazzjoni urġenti – li laħqet l-istess għan mingħajr ma toħnoq bla bżonn il-libertajiet fundamentali.
L-Avukat Adreana Zammit dehret ukoll għall-akkużat.
